Аймақта облыстық маңызы бар автомобиль жолдарының жалпы ұзындығы 6138,6 шақырымды құрайды. Соңғы ақпарат бойынша жоғары және орташа жағдайдағы облыстық маңызы бар автомобиль жолдарының үлесі жыл соңында 78,5 пайызға жетеді деп күтілуде.
Облыстық маңызы бар автомобиль жолдарында автокөліктің қауіпсіз және үздіксіз қозғалысын қамтамасыз ету мақсатында 2019 жылы жөндеу жұмыстарына 19 175, 2 млн. теңге қаражат бөлінді. Оның ішінде республикалық бюджеттен – 8 167, 674 млн. теңге, жергілікті бюджеттен – 11 007, 526 млн. теңге.
Қайта жаңартуға және жөндеу жұмысын қажет ететін 23, 5 шақырым автожолына және ЖСҚ және ТЭН әзірлеуге 3 409,785 млн. теңге бөлініп, игерілуде. Атап айтар болсақ, Балқаш жағалауындағы демалыс аймақтарына апаратын автожолдарды қайта жаңарту бағытында ағымдағы жылы «Алматы – Өскемен-Лепсі – Ақтоғай» жолына 1 915,806 млн. теңге, «Алматы – Өскемен-Қызыл қайың – Лепсі» бағытының жөндеу жұмыстарына 299,413 млн. теңге бөлінді. Сондай-ақ, Ескелді ауданындағы «Сарыөзек – Қорғас – Қоғалы – Көксу–Қарабұлақ», Жамбыл ауданындағы «Қарақастек – Сұраншы батыр» автожолдарына қайта жаңарту жұмыстары жүргізілуде. Жоба толықтай 2020 жылы аяқталады деп жоспарлануда.
Облысқа қарасты 17 аудан мен 2 қала маңындағы автожолды жөндеуге 2 206,356 млн. теңге, ал маршруттық әдіспен 72,4 шақырым автожолды, су өткізу құбырларын жөндеуге 2 100,9 млн. теңге бөлінді.
Айта кетерлігі, жол құрылысына тек отандық өнімдер пайдаланылуда. Жөндеу жұмыстарына жергілікті азаматтар тартылып, жұмыспен қамтылып отыр. Халықаралық және Республикалық маңызы бар жолдар болмаса, облыстағы жол құрылысы жұмыстарына шетел азаматтары тартылмайды.
Ержан ЖАСЫБАЕВ,
облыстық жолаушы көлігі және автомобиль жолдары басқармасының басшысы
