Ана тіл – адамның жан дүниесінің айнасы, өсіп-өніп түрлене беретін, мәңгі құламайтын бәйтерегі. Биылғы жылдың қыркүйек айында қазақ тілі мемлекеттік тіл дәрежесін иеленгеніне 30 жыл толады. Мемлекеттік мәртебеге ие болған тілді өз тұғырына қондырып, оның қолданылу аясын кеңейту мақсатында түрлі іс-шара жүзеге асырылып жатқаны баршаға мәлім. Осы орайда білім ордаларына да тапсырмалар берілген болатын.
Қазіргі таңда осы бағытта Зәмзәгүл Төлендина басшылық жасайтын Қапшағай қалалық №4 орта мектепте Қазақстан Республикасында тілдерді дамыту мен қолданудың 2011-2020 жылдарға арналған мемлекеттік бағдарламасы аясында бірқатар шаралар қолға алынып, жүйелі жұмыстар атқарылуда. Білім ордасында мектептің кіріс-шығыс іс-қағаздары, педагогикалық кеңестің, директор жанындағы отырыстың, ата-аналар жиналысының хаттамалары, семинарлар, баяндау хаттар, анықтамалар, мәліметтер, сыныптан тыс іс-шаралар мемлекеттік тілде жүргзіледі. Акциялар мен жобаларды ұйымдастыру және өткізу кезінде мемлекеттік тілді насихаттау, қазақ әліпбиін латын графикасына көшіру, ілеспе аударманы оқыту, тіл мәдениетін жетілдіру жұмыстары да жолға қойылған. Сондай-ақ, оқу ордасында әр аптаның сәрсенбі күндері «Мемлекеттік тіл – менің тілім» атты тақырыпта мектепішілік шара өтіп тұрады.
– Ұстаздардың мерзімдік басылымдарда өткізілген іс-шара, ашық сабақтар жайлы жазылған мақалалары мемлекеттік тілде жарық көруде. Мектепте қазақ тілі кабинеттері үнемі жаңартылып отырылады. Білім ұясында өзге ұлт өкілдеріне арналған «Қазақ тілін үйренейік!» үйірмесі жұмыс істейді. Оның «Бастапқы», «Жалғастырушы»,«Тереңдетілген» деген топтары тұрақты түрде жұмыс істеуде. Бұл үйірменің ауыз екі тілде сөйлеу, қазақ тіліне тән дыбыстардың айтылуы мен жазылуына ерекше мән беру, қазіргі заманға сай қазақ тіліні өз деңгейіне сай меңгерген сауатты да салауатты тұлға қалыптастыру жолға қойылған, – дейді мектеп директорының тәрбие ісі жөніндегі орынбасары Фарида Төлепова.
Мемлекеттік және орыс тілдерінде білім беретін аралас мектепте биылғы оқу жылында үш тұғырлы тілдер апталығы, соның шеңберінде достық фестивалі мен қазақ тілі мен әдебиеті әдістемелік бірлестігі ұстаздарының ұйымдастыруымен қазақ тілі мен әдебиетінің апталығы өтті. Апталық аясында түрлі іс-шаралардың жоғары деңгейде өтуіне барлық сынып оқушыларымен қатар, ата-аналар да белсене атсалысты.
Келешекте де осындай игілікті істер жүзеге асып, мемлекеттік тілдің мәртебесі биіктей бермек.
Айжарық КӨПТІЛЕУОВ
