Еліміздің құқық қорғау саласында еңбек ететін қыз-келіншектердің кәсіби дайындығы кейбір ерлерден асып түспесе кем соқпайды. Оған дәлелді көптеп кездестіруге болады. Мысалы, облыстық ішкі істер департаментінің инспекторы, полиция майоры Әсем Мұхамадиева «Макаров» тапаншасынан оқ атудан мерген атанып, әріптестерінің құрметіне бөленді.
8 наурыз – Халықаралық әйелдер күнінің қарсаңында өткізілген әскери қарудан оқ ату жарысына қатысып, үздік атанған полиция майоры:
– Алғаш рет табельді «Макаров» тапаншасын Семейдегі ҚР Ішкі істер министрлігінің заң колледжіне түскенде ұстағанмын. Сол жолы нысана көздегеннен бері тапанша ату маған ұнап қалды да, осы бір әскери қарумен тез достасып кеттім, – деп өзін толғандырған әсерімен бөлісті. – Содан бері, міне, 15 жыл өте шығыпты, тапанша ату бойынша дайындығымды жетілдіріп келемін. Соның арқасында өз бөлімшемнің атынан жарыстарға қатысып тұрамын. Сол себепті қаруды тек ерлер ғана емес, әйелдер де бағындыра алатынын айтқым келеді.
Бүгінгі күні еліміздің әйелдері барлық саланы меңгеріп, бұған дейін тек ерлер атқарады деп есептеліп келген мамандықты да игеруде. Қыз-келіншектер тіпті Қарулы Күштерде немесе теңіз флотында, авиация мен құқық қорғау органдарында да көптеп кездеседі.
Облыс көлемінде өткізілген біріншілік бойынша жүлделі екінші және үшінші орындарды полиция полковнигі Людмила Ким мен полиция подполковнигі Татьяна Қасымова өзара теңдей бөлісіп, жарыс көрігін қыздыра түсті.
Ресми деректерге қарағанда аймақтағы полиция құрамының 7,5%-ын әйелдер құрайды. Олардың басым бөлігі тергеу, штаб және мамандар бөлімдерінде, сондай-ақ, көші-қон және ювеналды полиция басқармаларында еңбек етеді. Ал, «полиция полковнигі» атағын облыстық ведомствода қызмет ететін 7 әйел иеленген.
Өз тілшіміз
