Ана – өмірдің өзегі, береке-бірліктің алтын діңгегі. Он сегіз мың ғаламда анадан ардақты тіршілік иесі жоқ. Жер бетіндегі жақсылық, ізгілік, қайырымдылық атаулы ананың ақ сүтінен тарайды.
Бүгін облыс әкімі Амандық Баталов алтын құрсақ аналар мен әр салада толымды еңбек етіп жүрген аналарды құтықтап, сый-құрмет көрсетті. – Өздеріңізбен көктемнің алғашқы мерекесі қарсаңында кездесіп отырғаныма қуаныштымын. Ақ бесіктің иесі, туған жердің киесі сіздерсіздер. Бағзы замманнан әйелдер ерлерге серік, сүйеу болып келеді. Ол үрдіс бүгінде жалғасуда. Соның дәлелі әйел-аналардың барлық салада азаматтармен бірдей еңбек етіп, тәуелсіз еліміздің гүлденуіне үлес қосып келе жатқандығы. Мемлекеттік қызметте 7544 адам болса, соның 48 пайызын әйелдер құрайды. Облысымыз бойынша әр деңгейдегі депутаттардың 57-сі нәзік жандылар. Сондай-ақ селолық, аудандық округтердің құрамында 16 қарындасымыз бар,– деді өлке басшысы. Басқосуда облыстың Құрметті азаматы Күмісжан Байжан облыс орталығынан «Анаға тағзым» атты ескерткіш орнатылса деген ойын жеткізді. Оған жауап берген Амандық Ғаббасұлы: –Өте орынды ұсыныс. Игі бастама екен. Ойланып, біраз уақытта жауабын айтамын, -деді. Жиын соңынан көп балалы аналарға «Алтын алқа», «Күміс алқаны» облыс әкімі Амандық Ғаббасұлы өз қолымен тақты. Еңбекпен ерекшеленгендерге Алғыс хат және Құрмет грамоталар табыс етілді. Құшақтары гүлге толыған аналар Салтанат сарайынан өздеріне құрмет көрсеткен азаматтарға алғыстарын жаудырып, мерейлері өсіп шықты.
Гүлжан Мұқашқызы.
