«Нұр Отан» партиясы облыстық филиалының мәжіліс залында Елбасы Нұрсұлтан Назарбаевтың «Болашаққа бағдар: рухани жаңғыру» атты мақаласында көрсетілген міндеттер мен тапсырмаларды іске асыру барысында атқарылып жатқан іс-шаралар туралы партиялық тыңдау өтті.
Елбасы өзінің бағдарламалық мақаласында саяси реформа мен экономикалық жаңғыруды қолға алғанымызды айта келіп, рухани жаңғырудың оның өзегіне айналуы тиіс екендігін атап өткен болатын. Яғни, біздің санамыз қай кезде де ісімізден озып жүруі, әрі жаңғырып отыруы тиіс. Осы орайда атқарылып жатқан ілкімді істер ел игілігіне жарауда.
Күн тәртібіндегі мәселеге қатысты бірнеше облыстық басқарма басшылары баяндама жасады. Атап айтсақ, ішкі саясат басқармасының басшысы Рустам Алпысбаев өңірімізде өткізіліп жатқан шараларға жан-жақты тоқталып кетсе, тілдерді дамыту жөніндегі басқарма басшысының міндетін атқарушы Гүлнәр Бітебекова «Қазақ тілінің латын әліпбиіне кезең-кезеңмен көшуі жобалары» туралы маңызды мағлұматтармен таныстырды. Мәдениет, мұрағаттар және құжаттама басқармасының басшысы Ақан Әбдуалиев «Жаһандағы заманауи қазақстандық мәдениет» жобасы аясында, ал туризм басқармасы басшысының міндетін атқарушы Бақытжан Оразбаев «Киелі жерлер географиясы», «Туған жер» жобалары төңірегінде атқарылған жұмыстар туралы баяндады. Жастар ресурстық орталығы директорының орынбасары Жандос Байқамитов жастарымыздың руханиятқа қосқан үлесін көрсетіп кетті.
«Нұр отан» партиясы облыстық филиалы төрағасының бірінші орынбасары Ғалиасқар Сарыбаев өз сөзінде:
– Мемлекет пен ұлт құрыштай құйылып, қатып қалған дүние емес. Ол, Елбасымыз айтқандай, үнемі дамып отыратын тірі ағза іспетті. Тірі ағза өмір сүруі үшін заман ағымына саналы түрде бейімделуге қабілетті болуы қажет, – деп жиылған көпшіліктің көкейінде жүрген сауалдарына жауап беруге дайын екендігін білдірді.
Шараға облыстық, аудандық, қалалық мәслихаттың депутаттары, облыстық мекеме, департамент басшылары, зиялы қауым БПҰ төрағалары, аумақтық партия филиалдары төрағаларының бірінші орынбасарлары, үкіметтік емес ұйымдардың өкілдері және «Жас отан» ЖҚ мүшелері мен БАҚ өкілдері қатысты.
Мұхтар КҮМІСБЕК.
