Қазақстан Республикасы Парламенті Мәжілісінің Төрағасы Нұрлан Нығматулин жұмыс сапарымен Іле ауданындағы «Aluminum of Kazakhstan» зауытының жұмысшы тобымен кездесті. Кездесуге облыс әкімі Амандық Баталов та қатысты.
Төраға ел ішінде өңірлерді аралап жүрген депутаттардың негізгі міндеті Елбасы Жолдауын халыққа түсінікті етіп жеткізіп, алға қойған тапсырмаларды кеңінен талқылау екенін айтып өтті.
– Елбасы Жолдауында ел дамуындағы негізгі бағыттарды айқындап, сыртқы сын-қатер басым болып тұрған кезеңдегі өзінің нақты кесімін айтып, тереңнен ойлап байлам жасап, салиқалы болжамын жеткізді. Қазақстан – қарқынды дамып келе жатқан жас мемлекет. Ішкі жағдайы тұрақты болғанымен жаһандық жағымсыз соққылар айналып өтпесі анық. Өсім, реформалар, даму атты Елбасының үш стратегиясы бәсекеге қабілетті ел қалыптастыру мақсатындағы маңызды түсініктеме екенін жақсы білесіздер. Ел экономикасының қарқынды дамуына ықпал жасар қуатты күштің көзі отандық өндірістің дамуы, алға өрлеуі керек. Алматы облысы республиканың дамуына зор ықпал етіп отыр. Мұнда ірі өнеркәсіптер, зауыттар, өндіріс орындары бар. Бүгін, міне, соның бірінде жүздесіп отырмыз, – деді Төраға.
Сонымен қатар, Төраға Мемлекет басшысының әлемдік аренада дамыған отыз елдің қатарына ену жолындағы жоспары екі кезең бойынша жүзеге асырылатынын еске салып өтті. 2030 жылға дейінгі алғашқы кезеңде бар мүмкіндікті пайдаланып, индустриялық-инновациялық тұрғыда дамудың даңғыл жолына серпіліс жасау, екінші кезеңде 2030-2050 жылдар аралығында ғылымға негізделген экономикаға қол жеткізу тапсырмасы да ертеңгі күннің жемісі.
Бүгінде Елбасы экономиканы әртараптандыру және оны шикізаттық емес, жоғары технологиялық жолға бағамдау жөнінде жаңа міндеттерді алға қойды. «Үдемелі индустриялық-инновациялық даму» жөніндегі мемлекеттік бағдарлама қарқын алып келеді. Бұл бағдарламаның басты мақсаты өнеркәсіпті тұтастай тұрғыдан да, жекелеген өндірістер тұрғысынан да қайта құрылымдау болып табылады. Кездесу барысында осы және өзге де тақырыптар мен отандық өнеркәсіп өнімінің әлемдік рыноктарда бәсекелесуге қабілеттілігіне қол жеткізу жолындағы құлшыныстар да сөз болды.
«Индустриялық-инновациялық даму» бағдарламасы аясында ашылған «Aluminium of Kazakhstan» ЖШС қазіргі уақыттағы «HOFFMANN Aluminium» сауда таңбасымен алюминий профильдерін өндіруші зауыт болып табылады. Зауыт директоры Нұрсұлтан Жұмабек:
– Зауыт технологиялық үрдісі бастапқы кезеңдегі алюминийді қайта өңдеу жолымен 1000-нан аса әртүрлі алюминий профилін еуропалық талапқа сай шығарады. Терезе-есік, жиһаз, офис құрылғыларын шығарады. Зауыттың жобалық қуаты жылына 12 000 тонна. Алда талай жоспарымыз бар, даму үстіндеміз, – деді.
Өз кезегінде аудан тұрғындары Ұлт көшбасшысының салиқалы саясатын қолдайтындықтарын жеткізді.
Іле ауданы.
