«Алматы Аренада» ине шаншар орын жоқ. Жанкүйерлер тағатсыздана күткен күн. Мұз айдында өз өнерлерін Алматы облысының тумасы Абзал Рақымғалиев пен ел мақтанышы, Сочи Олимпиадасының қола жүлдегері Денис Тен көрсетті. Бос орын қалмағандықтан кей жанкүйерлердің арена сыртында қалып қойғанын да айтуымыз керек. Лық толған залды мәнерлеп сырғанаушыларымыз өз өнерлерімен тәнті етті.
Бірінші күні қысқа бағдарламада 24 жастағы қазақтың спорт және туризим академиясының студенті Абзал Рақымғалиев өз өнері үшін төрешілерден 68.25 ұпай жинап 11-орын алса, негізгі бағдарламада 135.98 ұпай жинап (жалпы есеп – 204.23) жалпы есепте 12-орын алды.
Жалпы жарысқа қатысқан 36 мәнерлеп сырғанаушының тек 25-і негізгі бағдарламада өнер көрсетті. Өкінішке қарай, 17 жастағы Артур Паникин қысқа бағдарламасында 54.11 ұпай жинап, жалпы 28-орын алып, еркін бағдарламаға өтпеді.
Ал жұрт ықыласы мен қошеметіне ерекше бөленген 23 жастағы Қазақ ұлттық технологиялық университетінің студенті Денис Тен бірінші күні 94.91 ұпай, екінші күні 172.06 ұпай жинап (жалпы есеп – 266.97) Универсиаданың алтынын алды. Денис Тен бапкері Николай Морозовтың үйретуімен қысқа бағдарламада Сергей Прокофиевтің «Ромео мен Джулетта», негізгі бағдарламада Джокомо Пуччининің «Жабырқау» композицияларына биледі.
Ерлер арасындағы жекелей мәнерлеп сырғанауда екінші орынды жапониялық Кеджи Танака (жалпы есеп – 163.04), жалпы көрсеткіші 165.55 ұпаймен швед Александр Майров алды.
Жарыс соңында Денис Тен, Абзал Рақымғалиевтың ұзақ үзілістен кейін мұз айдынға оралғанымен құттықтап, өзіне келешекте серіктес болып шетелдерде сапарлас болуын тіледі. Ал Рақымғалиев Универсиададан кейінгі ірі жарыс – 19 – 26 ақпан аралығында Саппорода болатын Азия ойындарына қатысатындығын жеткізді.
Серік Қантаев.
