Осы аптада Қапшағай қаласының әкімі Талғат ҚАЙНАРБЕКОВ тұрғындар алдында қорытынды есеп берді. Оған облыс әкімі Амандық БАТАЛОВ қатысты.
Қала әкімі алда тұрған мәселелерді айқындап, қаланың әлеуетін арттыру мақсатында бірнеше жылға арналған даму жоспарын әзірлеп, бүгінде сол бағдарламаны басшылыққа алып жұмыс істейді.
Өңірге инвестиция тарту арқылы стратегиялық мақсатқа жетуге, өркендеуге мүмкіндік ашылатыны сөзсіз. Бүгінде негізгі аймақ капиталына 22,8 млрд. теңге инвестиция тартылды. Бұл көрсеткіштерге түрткі болған жобалар қатарында қуаттылығы 4,5 МВт болатын «АННАР» жел электр стансысы, «Грин Лэнд Алатау» кешенінің 2 кезеңі бар. Бұл өндіріс орны 2800 тонна көкөніс өндіреді. Соның нәтижесінде 60 жұмыс орны ашылды. Сонымен қатар «LST mаrket» ЖШС жылыжай кешенінің де 2 кезеңі қосылып, 30 адам жұмысқа орналасты. Кешен жылына 500 тонна өнім өндіреді.
Бүгінде бұл өңірде 16 ірі және орта кәсіпорындар жұмыс істейді. Ал тоқтап қалған кәсіпорын алаңдарына инвентаризациялау жұмыстары жүргізілмек. Осы 2017 жылдың жоспары бойынша жел электр стансысын салу, шетел инвестицияларының қатысуымен аяқкиім фабрикасын, бөлме есіктерін әзірлейтін өндіріс орнын іске қосу жоспарланып отыр. Ауылшаруашылығы бойынша 200 гектар жерге егілген қант қызылшасынан 7000 тонна өнім алынған. Алдағы жылы егіс көлемін 500 гектарға арттыру мақсатында сервистік дайындау орталығын құру жоспарланып отыр. Ал жоба бойынша 100 бас ірі қараға арналған сүт-тауарлы фермасын, Арна ауылында 100 бас ірі қараға арналған бордақылау алаңын, 20 мың бас құсқа арналған құс фабрикасын ашу көзделуде.
Тұрғын үй мәселесі бойынша мемлекеттік бағдарламалар есебінен үш 50 пәтерлі үйдің құжаттары әзірленуде. Коммерциялық бағыт бойынша осы жылы 2 тұрғын үйдің құрылысы басталады. Тозығы жетіп, қираудың алдында тұрған, 1967 жылдары салынған 32 көпқабатты үйдің жағдайы жылдар бойы қала тұрғындарын алаңдатып келген өзекті мәселе еді. Осы жылы екі үйді бұзу жұмыстарына ақша қарастырылып отыр. Өңірді газбен қамтамасыз ету жұмыстары да аяқталуға жақын.
Қалада білім, спорт, мәдениет, туризм саласы да сабақтасып жақсы дамуда. Қала әкімі қорытынды есепте банк қарызында тұрған балабақшаны, бұрынғы Мәдениет үйін де, орталық саябақты да қайта мемлекетке қайтаруға уәде берді. Сонымен қоса қалада спорт кешенін салу жоспары бар. Ал жақын күндері Арна ауылында Мәдениет үйі ашылмақ.
Жиын соңында сөз алған облыс әкімі Амандық Баталов:
– Қапшағай географиялық орналасуы мен экономикалық даму, туризмді өркендету жағынан мүмкіндігі зор аймақ. Қала әкімінің бағыты дұрыс, жоспарлары анық. Өнеркәсіп аймақтарын өркендету, инвесторлар тарту, қаланы көріктендіру, көл жағалауын дамыту, тұрғын үй және басқа да әлеуметтік нысандар салу туралы жоспарларына қолдау көрсетеміз. Өнеркәсіп алаңдарына жаңа өндіріс орындары салынбақ. Қапшағайда заман талабына сай Мәдениет үйі де бой көтеретін болады. Саябақтар жаңаша келбетке енеді. Аула алаңдары да жаңарады, – деді.
Жиын қорытындысы бойынша Қапшағай қаласының Құрметті азаматы Амангелді Бесбаев, жеке кәсіпкер Галина Пронченко, корей этноорталығының төрайымы Галина Ким, қалалық Мәдениет үйінің директоры Медет Дүйсембеков сөз сөйлеп, қала әкімінің берген жылдық есебіне қанағаттанарлық деген баға беріп, қадамына сәттілік тіледі. Жаңа әкімнен жаңа серпіліс алған қала тұрғындары алдағы жарқын күндерге сенім артып тарқасты.
Мақпал Мыса
Қапшағай қаласы.
