Елбасы Нұрсұлтан Назарбаев халыққа Жолдауында сыбайлас жемқорлыққа қарсы мәдениет қалыптастыру ең басты міндетіміз екенін тілге тиек етіп келеді. Соған орай «Достық үйі» қоғамдық келісім орталығының мәжіліс залында жаңа жобаның таныстырылымы өтті.
«Азаматтық бақылау» жобасының таныстырылымына Қазақстан халқы Ассамблеясының облыстық хатшылығы, облыстық «Азаматтық Альянс» заңды тұлғалар бірлестігі, облыстық кәсіпкерлер палатасы, қоғамдық кеңес, үкіметтік емес ұйым мүшелері мен жоғары оқу орындарының маманы қатысты. Жиында Қазақстан Республикасы Мемлекеттік қызмет істері министрлігінің облыс бойынша департаментінің басшысы –Әдеп жөніндегі кеңестің төрағасы Серікбай Нұрғисаев, облыс әкімінің кеңесшісі – әдеп жөніндегі уәкілі Талғат Өмірәлиев, «Innovation – Koldau» Қоғамдық қорының жетекшісі Әйгерім Молдабаева және Достық үйінің директоры Тәңірберген Қасымберкебаев сөз алып, жобамен егжей-тегжейлі таныстырды.
Серікбай Өрікбайұлы аталмыш жобаның сыбайлас жемқорлыққа тосқауыл болып, мемлекетіміздің одан әрі қарыштап дамуына ықпал ететіндігін айтты. Ал Әйгерім Молдабаева: «Азаматтық бақылау» жобасы Президентіміз Нұрсұлтан Назарбаевтың тапсырмасы бойынша ҚР-ның 2015–2025 жылдарға арналған сыбайлас жемқорлыққа қарсы стратегиясының бір бөлігі. Әсіресе, үкіметтік емес ұйымдармен бірлесе жұмыс жасаймыз. Себебі, мемлекеттік қызметті көбіне солар пайдаланады, біз олардың арыз-тілектерін тіркейміз, мониторинг жүргіземіз», – деді.
Бүгінде Қазақстанда сыбайлас жемқорлыққа қарсы күреске мемлекеттік мәртебе берілген, оны жою мен тежеу жөнінде қоғамдық және саяси күштермен бірлесе ауқымды жұмыстар атқарылуда. Барлық іс-әрекет мемлекет саясатының басым бағыттарының бірі болып айқындалды. Осыған орай, «Азаматтық бақылау» жобасын іске асыруға бағытталған мемлекеттік әлеуметтік тапсырыс бойынша жоба өз жұмысын бастады. ҚР МҚІМ-нің облыс бойынша департаментінің тапсырысымен жоба қызметін жария ету, негізгі аудиторияның миссиясы, қызметі және бағыттарымен таныстыру, азаматтармен қоғамдық қабылдау жүргізу міндеттері жүктелді.
Сыбайлас жемқорлыққа қарсы мәдениетті қалыптастыру, жемқорлықтың алдын алудағы мемлекеттік органдар мен азаматтық қоғамның әріптестігін одан әрі нығайту мақсатында қоғамдық қабылдау жүргізіледі. Онда негізгі қаралатын мәселелер: мемлекеттік қызмет, оның сапасы мен этикалық талаптарының сақталуы және сыбайлас жемқорлыққа қарсы мәдениетті қалыптастыру. Азаматтарды қабылдау «Достық үйі» қоғамдық келісім орталығында 9.00-ден 18.30-ға дейін жүргізіледі. Ал департамент басшысының қабылдау уақыты әр айдың екінші аптасының сәрсенбі күндері 11.00-ден 12.30-ға дейін.
Мәулен Әнербай
