Премьер-министр Кәрім Мәсімовтің төрағалығымен өткен селекторлық жиында Елбасының 2016 жылғы 1 шілдеде Индустрияландыру күнінде берген тапсырмаларының орындалу барысы мен ауылшаруашылығын дамытуға қатысты маңызды мәселелер талқыланды.
Осыған орай баяндама жасаған ҚР Ұлттық экономика министрі Қуандық Бишімбаев Үкіметке тұрғын үй құрылысының жаңа бағдарламасы ұсынылатынын, ауылшаруашылығын дамытуға бағытталатын шағын несиені қалалықтарға да беру тетігі қарастырылып жатқанын жеткізді.
Үкімет отырысында талқыға түскен тағы бір өзекті мәселе ветеринария саласына қатысты болды. Ол бойынша Ауылшаруашылығы вице-министрі Гүлмира Исаева еліміздегі ахуалды баяндап, сібір жарасы бойынша орны белгіленбеген 714 пункт бар екендігін айтып өтті.
Бұл мәселеге қатысты өңірлердегі ахуалға ерекше мән берілді. Облыс әкімі Амандық Баталов сібір жарасына қатысты жуырда орын алған жағдайды баян етті.
– Кербұлақ ауданындағы жағдайға тоқталып өтсем, маусымның 7-сі күні 3 тұрғын жергілікті дәрігерлік амбулаторияға келіп, дене қызуының жоғарылап, қолдарында бөрткен пайда болғанын айтқан. Дәрігерлер шамамен «сібір жарасы» деген диагноз қойған. Науқастар екі апта қажетті ем-домды қабылдап, үйлеріне қайтарылды. Маусымның 9-ы күні бірден тиісті мамандардың қатысуымен халықпен жиын өткіздік. Онда осы жағдайға себепші болған ірі қара малдың сойылғаны анықталды. Оған қатысы бар деген 123 адамға вакцина егу шарасы жүргізілді. Бізде тұрғындарға арналған 4 мың вакцина бар. Ветеринарлық қызмет эпизоотияға қарсы сақтық шараларын жүргізіп, 4794 бас малды тексеруден өткізді. Дезинфекциялау 5 мың шаршы метрлік аумақты қамтыды. Ауру таратқан малдың сүйек-саяғы жойылып, қайта сынақ алынды. Сібір жарасының қоздырғышы анықталған жоқ. Прокуратураның қаулысымен мал дәрігері мен мал иесінің үстінен қылмыстық іс қозғалды.
Облыста сібір жарасы қаупі бар 181 елді мекен бар. Сондай-ақ, індет ошағы болып табылатын 257 орынның 178-іне қоршау мен белгі қойылған. Қалған 79-ын қоршау үшін 89,9 млн. теңге бөлдік. Жалпы алғанда соңғы жылдары эпизоотияға қарсы шараларға 1,7 млрд. теңге қарастырылған, барлық аудандық медициналық бөлімше тоңазытқыштармен қамтылған, 352 мал қорымы бар. Ол үшін 545 млн. теңге қарастырылған, тағы қосымша 40 млн. теңге бөліп отырмыз. Бұл мәселе айрықша қадағалауымызда болады, – деді ол.
Премьер-Министр Кәрім Мәсімов кәсіпорындардағы жалақы қарыздарының төленуі жайына да назар аударды. Үкімет отырысы кезінде әкімдер аталған мәселеге қатысты ағымдағы жағдайды баяндады. Өз кезегінде облыс әкімі Амандық Ғаббасұлы мерзімі өтіп кеткен қарыз көлемінің 9,6 млн. теңгені құрап отырғанын, 5 кәсіпорын банкрот болғанын, олардың мүлкі сатылған соң қызметкерлерге жалақы төленетінін, жалпы алғанда, қарыз көлемі 25,8 млн. теңгені құрайтынын жеткізді.
Үкімет басшысы Кәрім Мәсімов облыс әкімдеріне жиында көтерілген мәселелерді қатаң бақылауға алуды тапсырып, нақты тапсырмалар берді.
Алма Есенбаева
