Қазақстан Ұлттық банкі криптовалютаны теңгеге ресми айырбастауға мүмкіндік беретін пилоттық жобаны іске қосқанын хабарлады, деп жазады 7-su.kz ақпараттық порталы.
Бұл бастама «реттеушілік құмсалғыш» (regulatory sandbox) аясында жүзеге асырылып жатыр. Арнайы режим инновациялық қаржы құралдарын сынақтан өткізуге және криптовалютаның көлеңкелі айналымын азайтуға бағытталған.
Ұлттық банк жобаны іске асыру және аяқтау тәртібін айқындайтын арнайы қаулы қабылдағанын мәлімдеді. Құжатта:
-
қатысушыларға қойылатын талаптар;
-
құжаттарды тапсыру және қарау рәсімі;
-
пилоттық жобаларды іске асыру шарттары;
-
цифрлық активтермен өзара әрекеттесу қағидалары көрсетілген.
Жобаға қатыса алады:
-
екінші деңгейлі банктер,
-
банктік операцияларды жүзеге асыратын ұйымдар,
-
төлем компаниялары,
-
Қазақстанда тіркелген өзге де заңды тұлғалар.
Пилоттық жобаның төрт негізгі бағыты:
1. Теңгеге байланған стейблкойндер
Фиаттық (шынайы валютамен қамтамасыз етілген) стейблкойндер сынақтан өтеді. Бұл теңгемен есеп айырысудың тиімділігін арттырып, шетелдік долларлық баламаларға балама ұсынады.
2. Жылжымайтын мүлікті токенизациялау
Цифрлық токендер арқылы меншік құқығын рәсімдеу қарастырылады. Бұл құрылыс салушыларға инвестиция тартуға, ал қарапайым азаматтарға коммерциялық жылжымайтын мүлікке қол жеткізуге жол ашады.
3. Нақты сектор активтерін токенизациялау
Компания капиталына үлесті, қарыз талаптарын цифрландыру арқылы нақты экономикаға инвестиция тарту көзделеді.
4. Криптовалютаны ақшаға айырбастау
Биткоин секілді қамтамасыз етілмеген цифрлық активтерді теңгеге тікелей айырбастау алғаш рет заңды негізде сынақтан өтеді. Бұл қауіп-қатерді бағалап, болашақта криптонарықты тиімді реттеуге мүмкіндік береді.
Көлеңкелі нарықпен күрес – басты мақсат
Ұлттық банк жаңа жобаның негізгі мақсаты – криптовалютамен байланысты операцияларды заңдастыру және ашық нарық қалыптастыру екенін атап өтті. Бұл криптоинвесторларды «көлеңкелі аймақтан» шығарып, қаржы қозғалысына бақылауды күшейтеді және заңсыз айналымды қысқартады.
