2025 жылғы 8 тамызда Алматы облысы Жамбыл ауданына қарасты Үлкен ауылының маңында Қазақстан тарихындағы тұңғыш атом электр стансасының (АЭС) құрылысы ресми түрде басталады.
Бұл туралы 7-su.kz ақпараттық порталы Атом энергиясы жөніндегі агенттікке сілтеме жасап хабарлады.
Салтанатты шара аясында ресми тұлғалар сөз сөйлеп, бұрғылау жұмыстарының басталғанын жариялайды. Атап айтқанда, топырақ сынамалары алынбақ, кейін бұл сынамалар арнайы капсулаға салынып, зерттеу мақсатында ресейлік тарапқа табысталады.
АЭС құрылысы жобасының бас мердігері ретінде ресейлік «Росатом» мемлекеттік корпорациясы басқаратын консорциум таңдалған.
Еске сала кетейік, 2025 жылдың ақпан айында Алматы облысының Жамбыл ауданы АЭС салу орны ретінде ресми бекітілген болатын. Бұған дейін Үлкен ауылы әлеуетті орындардың қатарында болған.
Атап өтерлігі, биылғы қаңтарда Мемлекет басшысы Қасым-Жомарт Тоқаев Үкімет пен «Самұрық-Қазына» ұлттық әл-ауқат қорына атом энергетикасын дамыту стратегиясын әзірлеуді, соның ішінде елде екінші АЭС салу үшін орын таңдауды тапсырған еді.
