Сауда және интеграция министрі Арман Шаққалиев Қазақстанның кейбір өңірлерінде ет бағасының қымбаттауына қатысты пікір білдірді, деп хабарлайды 7-su.kz ақпараттық порталы.
Министрдің айтуынша, ет бағасының өсуіне екі негізгі фактор себеп болып отыр.
«Біріншіден, бұл – жаһандық мәселе. Бразилия мен Аргентина сынды әлемдік ірі ойыншылардың нарықтағы көлемі өзгерді. Екіншіден, көрші елдердегі баға айтарлықтай жоғары, сұраныс өте үлкен. Біз мұндай серпінді байқап, белгілі бір іс-шараларды, соның ішінде сыртқы сауда бағытында бастамалар көтердік», – деді Арман Шаққалиев Үкіметтегі брифинг барысында.
Министрлік не істейді?
Журналистер министрден: «Ет қымбаттап жатыр. Қазақстандықтар неге дайындалуы керек?» – деп нақтылады. Бұған жауап ретінде Шаққалиев:
«Министрлік үшін ең басты міндет – ай сайынғы баға өсімін 0,4 пайыздан асырмау. Осы шектеуде ұстауға жұмыс істеп жатырмыз», – деді.
Статистика не дейді?
Ұлттық статистика бюросының мәліметінше, 2025 жылғы маусым айында:
-
Ет пен ет өнімдері бір айда 1,2% қымбаттаған;
-
Соңғы бір жылда баға өсімі 11,3%-ды құраған.
Соған қарамастан, қазақстандықтар ет тұтынуын азайтпағаны да хабарланған болатын.
