Бұл жолғы нысандарды аралауда Ернат Дүйсенбекұлы алдымен қаладағы жаңадан бой көтерген Жастар-3 тұрғын үй алабына ат басын тіреп, ондағы жол құрылысына баса назар аударды. Әрі ол жердегі газ желісін тарту мәселелері бойынша жобаны тағы бір мәрте пысықтап шықты. Сондай-ақ шаһардағы Шахворостова көшесі мен Еркін ауылындағы Сарыбұлақ көшесінде ауыз су жүйесін тарту жұмыстарымен де танысты. Қазір аталмыш аумақтарда атқарылып жатқан жұмыстардың ауқымы кең.
Салаға жауаптылардың сөзінше, бүгінгі таңда қала бойынша 90 шақырымға жуық кәріз және ауыз су жүйесі қайта жаңғыртылып, ретке келтірілмек. Бұл жоба 2026 жылы толық аяқталады деп жоспарланған. Қазір қаланың «Оңтүстік-Батыс» шағын ауданында 1 шақырым жердегі кәріз жүйесін тарту жұмыстары да жалғасуда. Сонымен қатар биылғы жылы шаһарда 70 шақырымнан астам жол жөндеуден өткізілмек. Атап айтқанда, аймақтағы жаңадан бой түзеп келе жатқан Құлагер, Бірлік, Жастар-1 шағын аудандары мен Солтүстік-Батыс тұрғын үй алабындағы 107 жаңа көшенің 54 шақырымға жуық жолына құрылыс жұмыстары жүргізу қолға алынған. Осы орайда 21 шақырымнан астам жолға күрделі, 27,9 шақырым болатын 28 көшенің жол орташа, 17 шақырымнан астам жолға ағымды жөндеу жұмыстары жүргізілмек.
– Қазіргі кезде қаладағы инфрақұрылымдарды жақсарту бағытында кезең-кезеңімен қолға алынуда. Бұл өңір тұрғындарының жайлылығы мен қауіпсіздігін қамтамасыз етуге бағытталған. Сол үшін істеліп жатқан әр істің сапасы мен мерзімі басты назарда болуы тиіс. Бұл жұмыстар күнделікті біздің бақылауымызда болады, –деді шаһар басшысы.
Осы орайда құрылыс саласы жауаптыларымен кездескен қала әкімі кейбір кемшіліктерді ескеріп, олқылықтарды тез арада жоюға нақты тапсырма берді. Сапарының соңында Еркін ауылында жаңадан салынып жатқан 150 орынды мәдениет үйінің құрылысымен де танысқан Ернат Бәзіл бұл нысанның ауыл тұрғындарының мәдени өмірін жандандыруда маңызды рөл атқаратынын айрықша атап өтті.
Айдын КӘЛІМХАН
