Қазақстанда әуе электр беру желілерінің (ЭБЖ) ақауларын анықтау жүйесі іске қосылды. Жоба ұшқышсыз ұшу аппараттары мен жасанды интеллект технологияларын пайдалана отырып, желілік инфрақұрылымдағы ақауларды автоматты түрде анықтауға мүмкіндік береді.
Жүйе «Жанармай-энергетика кешенін басқарудың бірыңғай мемлекеттік жүйесі» (EnergyTech) платформасы аясында, ЖЭК-ті цифрлық трансформациялау картасына сәйкес енгізілуде.
Цифрлық сервис арқылы:
-
бейнематериалдар, фотосуреттер, термобейнелеу және LiDAR деректерін талдау арқылы ақаулар автоматты анықталады;
-
анықталған ақаулар техникалық нүктелермен байланыстырылып, нысандар цифрлық тіркеуден өтеді;
-
техникалық жағдай машиналық оқыту арқылы талданады (анықтау дәлдігі – 98%-ға дейін);
-
жасанды интеллект модельдерін қайта оқытуға арналған эталондық мәліметтермен салалық визуалды ақпарат дата-орталығы құрылады;
-
ақауларды техникалық қызмет көрсету және жөндеу жүйелеріне автоматты бағыттау сценарийлері жүзеге асырылады.
Энергетика министрлігінің мәліметінше, жүйе электр энергиясын жеткізу және тарату желілеріндегі апаттылықты азайтуға, проактивті диагностика мен цифрлық техникалық қадағалауға көшуге жол ашады.
Жоба Энергетикалық және коммуналдық секторларды жаңғырту жөніндегі Ұлттық жобаның мақсаттарына толық сәйкес келеді. Министрлік саланың негізгі үдерістерін кең көлемде цифрландыруды жалғастырып жатыр.
«Жетісу-Ақпарат»
