Денсаулық сақтау министрлігі азаматтарды жыл сайын профилактикалық және скринингтік тексерулерден өтуге шақырды, деп хабарлайды 7-su.kz ақпараттық порталы turkystan.kz сайтына сілтеме жасап.
«Халық денсаулығы және денсаулық сақтау жүйесі туралы» Кодекстің 80-бабының 3-тармағына сәйкес, Қазақстан азаматтары профилактикалық медициналық қарап-тексеруден және скринингтік зерттеулерден өтуге міндетті. 2025 жылдан бастап міндетті әлеуметтік медициналық сақтандыру (МӘМС) жүйесіндегі мәртебесіне қарамастан, онкоскринингтер барлық азаматтарға қолжетімді.
Скрининг жүрек-қан тамырлары ауруларын, қант диабетін, глаукоманы, сүт безі, жатыр мойны және ішек обырын, В және С вирустық гепатиттерін, цереброваскулярлық бұзылуларды және басқа да қауіпті ауруларды ерте анықтауға мүмкіндік береді.
Скринингтен өтетін негізгі санаттар:
-
Жүрек-қан тамырлары аурулары: 40–76 жастағы ерлер мен әйелдер;
-
Қант диабеті: 40–76 жастағы ерлер мен әйелдер;
-
Глаукома: 40–76 жастағы ерлер мен әйелдер;
-
Сүт безі обыры: 40–76 жастағы әйелдер;
-
Жатыр мойны обыры: 30–74 жастағы әйелдер;
-
Колоректалдық обыр: 50–76 жастағы ерлер мен әйелдер;
-
В және С вирустық гепатиті: медицина қызметкерлері, операция алдындағы пациенттер, гемодиализ, онкология, трансплантология, кардиохирургия, пульмонология орталықтарының пациенттері, донорлар және жүкті әйелдер;
-
Цереброваскулярлық бұзылулар: 50–76 жастағы ер адамдар.
Тексеруден өту үшін емханаға жеке куәлікпен бару жеткілікті. Сондай-ақ тіркелу, call-орталық немесе Damumed мобильді қосымшасы арқылы алдын ала жазылуға болады. Көп жағдайда учаскелік дәрігерлер немесе мейіргерлер жас және басқа да өлшемдер бойынша тізім жасап, тұрғындарды өздері шақырады.
Министрлік азаматтарға денсаулығына қатысты шағым болмаса да скринингтен өтуге кеңес береді. Бұл ауруларды ерте анықтаудың және денсаулықты сақтаудың тиімді тәсілі болып саналады.
