Компания басшысы Дмитрий Страховтың жылыту қазандықтарын шығару бойынша зауыт ашу идеясы 2002 жылы пайда болған. Компания бұған дейін жылу және сумен жабдықтау жүйелерін орнатумен айналысқан. Кейіннен олар орнатқан жабдық өзінің сапасы бойынша нарық сұранысын қанағаттандырмайтынын білді. Сөйтіп, нарықты зерттей келе қатты отынмен жұмыс істейтін қазандықтарды дамытудың маңыздылығын түсінді.
Нәтижесінде шағын үйлерді жылытуға арналған алғашқы өнімдер өндірді. Олар шығарған қазандықтан Талдықорған қаласы мен облыс тұрғындарының көңілінен шығып, нәтижесінде өндіріс көлемі артты. Бүгінгі таңда «TeploStandart» компаниясында түрлі көлемде қазандықтар шығарылады. Талдықорған, Алматы және Астана қалаларында 3 қойма, кең ауқымда жұмыс істейтін дилерлер мен серіктестері бар.
Өндіріс цехын кеңейту мақсатында компания «Банк ЦентрКредит» АҚ-нан несие алды. «Бірыңғай кешенді бағдарламасы» шеңберінде субсидиялау құралы бойынша кредит пайыздық мөлшерлемемен 8%-ға дейін төмендетілді. Сондай-ақ, «Даму» қорының кепілдігі берілді.
А. БАЙЖҰМАҚЫЗЫ
