Жетісу облысында фермерді жалған құжаттар арқылы субсидия жымқырды деп айыптауда. Ол мемлекеттен заңсыз алған дотацияның бір бөлігін құмар ойындарға жұмсаған.
Қазір бұл дерек негізінде Жетісу облысы бойынша Қаржылық мониторинг агенттігі департаменті тергеу жүргізуде.
Күдікті, ЖШС басшысы бола тұра, екі жыл бойы жалған құжаттарды пайдаланып, мемлекеттік «Ауыл шаруашылығы басқармасынан» сүт өнімдерін қайта өңдеуге бөлінген субсидияларды заңсыз алып отырған. Жалпы залал 300 млн теңгеден асты. Шығынды растау үшін АШБ-ға жеке кәсіпкерлерден шикі сүт сатып алды деген жалған есеп-қисап құжаттары және май өндіргені туралы шындыққа жанаспайтын мәліметтер тапсырылған. Сонымен қатар заңсыз алынған субсидияның бір бөлігі – 110 млн теңге мөлшерінде күдікті тарапынан казиноға құмар ойындарға жұмсалған, – делінген ведомство хабарламасында.
Сот санкциясымен зауытқа құны 300 млн теңгеден асатын тыйым салынды.
Күдіктіге бұлтартпау шарасы ретінде үй қамағы бекітілуде.
Тергеу жалғасуда.
Дереккөз: BAQ.KZ
