Қазақстан Республикасы Премьер-министрінің бірінші орынбасары Роман Склярдың төрағалығымен елдегі жанар-жағармай нарығындағы жағдайға арналған кеңес өтті. Отырысқа энергетика вице-министрі Әлібек Жамауов, қаржы вице-министрі Ержан Біржанов, ішкі істер министрінің орынбасары Игорь Лепеха, Қаржы мониторингі агенттігі төрағасының орынбасары Қайрат Бижанов және ҰҚК Шекара қызметінің өкілдері қатысты.
Кеңесте ішкі нарықты ЖЖМ-мен тұрақты қамтамасыз ету, сондай-ақ шекара маңындағы облыстарда мұнай өнімдерінің заңсыз айналымына жол бермеу мәселелері қаралды. Энергетика министрлігінің дерегінше, қазіргі таңда елде қажетті отын қоры жеткілікті, нарықтағы жағдай тұрақты.
Жиын қорытындысы бойынша Роман Скляр жауапты органдарға мұнай өнімдерінің шекарадан заңсыз шығарылуына тосқауыл қою үшін егжей-тегжейлі жоспар әзірлеуді тапсырды. Мониторинг өңірлердегі тауар қозғалысы мен отын шығынын қоса қамтуы тиіс.
Премьер-министрдің бірінші орынбасарының айтуынша, мемлекеттің басты міндеті – ішкі қажеттілікті толық қамтамасыз ету. Бағадағы айырмашылық пен логистикалық қиындықтар тапшылыққа әкелмеуі тиіс.
Аталған мәселе Үкіметтің тұрақты бақылауында.
