Қазақстанда созылмалы және әлеуметтік маңызы бар ауруларға шалдыққан азаматтар кепілдендірілген тегін медициналық көмек (ТМККК) пен міндетті әлеуметтік медициналық сақтандыру (МӘМС) жүйесі аясында тегін дәрі-дәрмек алуға құқылы. Бұл туралы Әлеуметтік медициналық сақтандыру қоры басқарма төрағасының орынбасары Сәуле Тәжібаева мәлімдеді, деп хабарлайды 7-su.kz ақпараттық порталы.
Оның айтуынша, ТМККК және МӘМС тек медициналық қызметтерді ғана емес, сонымен бірге амбулаторлық және стационарлық ем кезінде берілетін дәрілік заттарды да қамтиды. Қазіргі таңда арнайы тізім бойынша 84 түрлі ауруға қарсы 372 дәрі-дәрмек пен медициналық бұйым тегін ұсынылады.
Сәуле Тәжібаеваның сөзінше, ең көп қаржы ТМККК пакетіне жұмсалады, себебі онкологиялық және сирек кездесетін ауруларға арналған препараттар құны миллион теңгеге дейін жетуі мүмкін.
2025 жылдың қаңтар–шілде айларындағы көрсеткіш:
-
ТМККК аясында – 1,4 млн пациентке 131,7 млрд теңгеге дәрі берілді;
-
МӘМС аясында – 1,26 млн адамға 18,5 млрд теңгеге препарат жеткізілді.
2024 жылы бұл мақсатқа жалпы 246,2 млрд теңге бөлінген. Амбулаторлық дәрілер тек диспансерлік есепте тұрған науқастарға қолжетімді. Ол үшін диагноз расталып, дәрігер рецепт жазуы тиіс.
Егер дәрі уақытылы берілмесе, азаматтар «СК-Фармация» байланыс орталығына 1439 нөмірі арқылы хабарласа алады.
