Президент Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауын іске асыру аясында Үкімет көлік-логистикалық инфрақұрылымды дамыту бойынша жұмыстарды жалғастыруда.
2025 жылы құрылыс-жөндеу жұмыстары 13 мың шақырымнан астам автожолды қамтыды. Оның ішінде 7 мың шақырымында орташа жөндеу жүргізілуде. «Жезқазған – Петропавл», «Мұқыр – Құлсары», «Орал – Атырау» және басқа да маңызды бағыттар қамтылды. Сонымен қатар, «Орталық – Батыс» автожолы, «Ақтөбе – Ұлғайсын», «Қарағанды – Жезқазған» учаскелері, Сарыағаш, Рудный және Шымкент айналма жолдарының құрылысы басталды. «Қалбатау – Майқапшағай» жолының құрылысы аяқталуға жақын.
Артық жүктемені бақылау үшін 60 автоматтандырылған өлшеу стансасы (АӨС) орнатылды. Жыл соңына дейін олардың саны 220-ға жетпек.
«Цифрландыруға көп көңіл бөлінуде. Электронды билеттер, цифрлық диспетчерлеу, болжамды техникалық қызмет көрсету, зияткерлік көлік жүйелері енгізілуде», — деді көлік вице-министрі Мақсат Қалиақпаров.
