Қазақстан Президенті Қасым-Жомарт Тоқаев Қырғызстанның бірқатар мемлекет және қоғам қайраткерлерін марапаттады, деп хабарлайды 7-SU.KZ ақпараттық порталы.
Мемлекет басшысының Жарлығымен Қазақстан мен Қырғызстан арасындағы достық пен ынтымақтастықты дамытуға қосқан еңбегі үшін Қырғыз Республикасы Министрлер кабинеті төрағасының орынбасары – Мемлекеттік ұлттық қауіпсіздік комитетінің төрағасы Камчыбек Ташиев І дәрежелі «Достық» орденімен наградталды.
Сонымен қатар VII шақырылған Жогорку Кенеш депутаты Дастанбек Жұмабеков, Президенттің кеңесшісі Арслан Койчиев және қоғам қайраткері Аскар Салымбеков ІІ дәрежелі «Достық» орденімен марапатталды.
Салтанатты рәсімде Қасым-Жомарт Тоқаев марапат иелерінің қазақ-қырғыз қарым-қатынасына қосқан үлесін жоғары бағалап, саяси, экономикалық және мәдени байланыстардың нығайып келе жатқанын атап өтті. Президенттің айтуынша, бұл шара екі елдің бауырластық қарым-қатынасына деген шынайы құрмет пен ризашылықтың белгісі болып табылады.
