Ел экономикасын дамытуда жеңіл өнеркәсіптің атқаратын қызметі жоғары. Жергілікті тұрғындардың әлеуметтік жағдайын жақсартуда, әсіресе қыз-келіншектердің жұмыссыздығын жоюда аталған саланы өркендету маңызды. Сондай-ақ, оның өнімдеріне сұраныс әрдайым жоғары, яғни азық-түлік тауарларынан кейінгі екінші орында.
Талдықорған қаласында тігін тігу ісін бұрыннан өркендетіп келе жатқан іргелі кәсіп-орындардың бірі «Ажар» ЖШС фабрикасы. Ол 1933 жылы құрылып, 1991 жылы «Ажар» жекеменшік кәсіпорны болып аталды. 1996 жылы «Ажар» ЖАҚ, 2004 жылы «ТФ Ажар» ЖШС ретінде тіркелді. Аталған фабрика бүгінде өз алдына өндірістік және сауда-саттық қызметі бар жеңіл өнеркәсіп орны. Бір ғасырға жуық тарихы бар осындай тігін фабрикасының бүгінгі тыныс-тіршілігімен танысу үшін журналистермен арнайы баспасөз туры ұйымдастырылды. Бұл жердегі жұмыс үдерісімен кәсіпорын директорының өндіріс және қызметкерлермен жұмыс жөніндегі орынбасары Лилия Тегай таныстырды.
Кәсіпорынды аралау кезінде жылдар әкелетін жаңа талаптардың өз деңгейінде орындалып жатқанын, қазіргі заманғы сұранысқа сай өндіріс желісінің шетелдік құрал-жабдықтармен жаңартылғанын, киім өнімдерінің тұтынушы көңілінен шығатындай жоғары сапада тігілуде екенін көрдік. Фабрикада ерлер мен әйелдерге және барлық жастағы балаларға арналған өнімдер шығарылады. 1992 жылдан бастап кәсіпорын Қазақстан Республикасының күштік құрылымдарымен тығыз қарым-қатынас орнатып, содан бері оларға киімдер тігіп келеді. Бұл өз кезегінде шетел мемлекеттерін де мойындатты. Сонымен бірге ұлттық компаниялар мен кәсіпорындарға арналған киім түрлері, балалар костюмдері, мектеп формасы сияқты бұйымдар шығарылады.
Лилия Тегайдың айтуынша, фирма бұйымдарының басқа құрастырушылардан айырмашылығы, пайдаланатын мата сапасының жоғары болуына ерекше мән беретіндігінде. Мұнда қазір 150 шақты адам еңбек етеді. Сонымен бірге фабриканың Жаркент пен Үштөбе қалаларында филиалдары жұмыс істейді. Байқағанымыздай, кәсіпорында еңбек ететіндердің басым бөлігі байырғы кадрлар, яғни, зейнет жасына таяған әйелдер мен зейнеткерлер. Олардың 30-40-50 жылдан аса еңбек өтілдері бар. Тәжірибелі тігіншілер бар білгендерін жас қыз-келіншектерге де үйретеді.
– Тігінші мамандығы бойынша білім алып, 20 жасымда осы жерге жұмысқа орналастым. Қазір жасым 65-ке келді. Бұл іспен айналысып, фабрикада қызмет атқарып келе жатқаныма 40 жылдан асты. Жұмысым өзіме ұнайды. Ұжымым ауызбірлікті. Кәсіпорын басшылығы бізді қиын кезеңдерде де қалдырған жоқ. Ақшалай болмаса да, мүмкіндігінше азық-түлікпен қамтамасыз етті. Көп көмек берілді. Сол себепті, бұл жер мен үшін өте ыстық. Өз үйімдей көремін. Қазір зейнеткермін, соған қарамастан тігін тігуді жалғастырып келемін. 2 балам, 5 немерем бар, – дейді озат тігінші Разгүл Қойшыбекова.
Зауыт басшылығы құрметке лайық мұндай тәжірибелі тігіншілерді ескерусіз қалдырмайды. Оларға арнайы сыйлықтар мен сыйақылар табыс етеді. Мұндай шараларды ұйымдастырып, қызықты өтуіне белсене атсалысып жүретін Тегай Лилияның бұл істегі еңбегін ерекше атап өткен орынды.
– Осы фабрикада жұмыс істеп келе жатқаныма 20 жылдан асты. Оқуымды бітіріп, осы жерге келдім. Сөйтіп, тігінші, тігін ісінің шебері, нормалау жөніндегі инженер қызметтерін атқардым. Кейіннен еңбегім бағаланып, биылдан бастап тігін тігу цехының жетекшісі қызметін атқарудамын. Өздеріңіз көргендей, цехтағы тігіншілердің көбі егде жастағы әйелдер. Соған қарамастан олар да қатардан қалмай еңбектеніп келеді. Ал жастарды сирек кездестіресіз. Тіпті, жоқтың қасы деуге болады. Сондықтан бізде бүгінде кадр мәселесі өзекті. Өкінішке қарай, қазіргі жастардың тігін тігуге деген құлшынысы көңілдегідей емес. Оқуын бітіріп, бір топ қыз келген, содан қалғаны біреу. Жастарға айтарым, еңбектен қашпау керек. Адал атқарсаң ол қай кезде де бағаланады, – дейді тігін цехының жетекшісі Лаура Саурамбаева.
Сол сияқты Айнұр Айсена да тәжірибелі маман. Айтуынша, ол 2000 жылы Талдықорған қаласындағы кәсіптік- техникалық колледжді бітіріп, фабрикаға келген. Содан бері өз ісінің шебері ретінде кәсіпорында еңбектеніп келеді. Тігіншілік өнер анасынан дарыпты. Бүгінде отбасылы, екі ұлдың анасы.
