«Білім келешегі: адал азамат, кәсіби маман» тақырыбында өткен алқалы жиынға қала әкімі Ернат Бәзіл және білім саласының жауаптылары, мектеп директорлары мен мұғалімдер қатысты. Жиналған қауым алдында баяндама жасаған қалалық білім бөлімінің басшысы Шынар Шәрипбаева 2024–2025 оқу жылындағы атқарылған істерге кеңінен тоқталып, жаңа оқу жылының жоба-жоспарларымен бөлісті. Сондай-ақ ол өткен оқу жылында облыс орталығындағы білім шаңырақтарында 35 мыңнан астам оқушы оқыса, жаңа оқу жылында 36 мың бала білім алатынын жеткізді. Ал биыл жазда қала мектептерінен 1442 түлек үлкен өмірге қадам басып, 45-і оқушы «Алтын белгі» иегері атанып, 68-і үздік аттестатпен мектеп бітіргенін атап өтті.
Осыдан соң білім болашағымыздың алтын қазығы деген Талдықорған қаласының әкімі Ернат Бәзіл барлық ұстаздар қауымын осыған дейін жеткен жетістіктерімен құттықтап, жаңа оқу жылына толағай табыс тіледі.
Шаһар басшысының сөзінше, бүгінде Мемлекет басшысы Қасым-Жомарт Тоқаевтың білім беру саласын дамытуға қатысты негізгі бес бағытты атап көрсеткен еді. Соның аясында әр жыл сайын өңір ұстаздары мен оқушыларға түрлі көмектер көрсетіліп, жаңа мектептер салынуда. Мәселен, өткен жылы қала аумағындағы Ынтымақ елді мекенінен заман талабына сай жабдықталған, 1200 орынды жаңа мектеп қолданысқа берілсе, алдағы уақытта «Батыс» және «Құлагер» шағын ауданынан 200 орынды, «Жастар-2» және «Көктал» тұрғын үй алабында 900 орынды мектеп салу жоспарланған. Қазір аталған білім шаңырақтарының жобалық-сметалық құжаттары әзірленуде. Осының барлығы білім саласына деген жан-жақты қолдау. Бастысы сапалы білім беру жүйесін дамытып, жас ұрпаққа қолайлы әрі қауіпсіз орта қалыптастыру және ұстаздардың кәсіби беделін арттыру.
– Бүгінгі талқылаған мәселелер жаңа оқу жылындағы басты міндеттерді айқындап берді. Әсіресе, мектепте олқылықтардың алдын алу, оқушылардың қауіпсіз ортасын қалыптастыру, жас мамандарды қолдау және жаңа жүйені дамыту біздің негізгі бағыттарымыздың бірі, — деп білемін. Сондай-ақ, инклюзивті білім беру тәсілдерін жетілдіру, оқушылардың жан-жақты дамуына жағдай жасау барлығымыздың ортақ жауапкершілігіміз,– деді Ернат Дүйсенбекұлы.
Жиын соңында білім саласында табысты тер төгіп жүрген бірқатар үздіктер қала әкімінің Құрмет грамотасы және арнайы Алғыс хаттарымен марапатталды.
Айдын КӘЛІМХАН
