Қазақстан Республикасының Президенті Қасым-Жомарт Тоқаев ел Конституциясының 30 жылдығына арналған «Конституция және мемлекеттілік: құқық пен болашақ диалогы» атты ғылыми-практикалық конференцияда сөз сөйледі, деп хабарлайды 7-su.kz ақпараттық порталы.
Мемлекет басшысы жиынның тарихи мәніне тоқталып, Ата заңның ел дамуындағы айрықша рөліне назар аударды.
– «Осыдан 30 жыл бұрын бүкілхалықтық референдумда Қазақстан Республикасының Конституциясы қабылданды. Бұл – егемен еліміз үшін тарихи сәт болды. Баршаңызға құтты болсын деймін. Шын мәнінде, Ата заңнан биік ештеңе жоқ. Конституция – мемлекеттігіміздің мызғымас тұғыры, Тәуелсіздігіміздің айнымас темірқазығы», – деді Қасым-Жомарт Тоқаев.
Президент қазақ халқының ежелден құқық пен әділдікті жоғары қойғанын айта келе, дала заңдарының тарихи сабақтастығын атап өтті.
– «Қазақ – Ұлы дала заңына бас иген, ар-ұяттан аттамаған халық. Қасым ханның қасқа жолы, Есім ханның ескі жолы, Әз Тәукенің Жеті жарғысы – нағыз дала заңының жарқын үлгілері. Бұл дәстүр ешқашан үзілген емес. Жұртымыз дала заңынан қазіргі Ата заңына дейін тарихи жолдан өтті», – деді Мемлекет басшысы.
Сонымен бірге ол өткен ғасырдың басындағы қазақ зиялыларының еңбегін, Кеңес дәуіріндегі құқықтық іргетастың қалануын және білікті заңгерлердің қалыптасуын атап өтті.
