Салтанатты шарада облыс әкімінің орынбасары Марлен Көлбаев орталықтың маңыздылығына тоқталды.
– Отбасы – мемлекеттің іргетасы. Қазіргі таңда жас отбасылар түрлі әлеуметтік-тұрмыстық қиындықтарға тап болып жатады, ажырасу жағдайлары да көбейіп отыр. Сондықтан дер кезінде қолдау көрсетудің мәні зор. Аймақ басшысының бастамасымен облыстағы әр отбасының берік, іші берекелі болуы үшін нақты шаралар жүзеге асуда. Көксуда ашылған жаңа орталық – соның айғағы.
Көксу аудандық ардагерлер кеңесінің төрағасы Сайлау Бәзілов те орталықтың мәнін атап өтіп, бұл тек әлеуметтік нысан ғана емес, аудан халқы үшін мереке қарсаңындағы ерекше сый екенін жеткізді.
Ал облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Сәния Наурызбаева орталықтың негізгі міндетін түсіндірді:
– Мұнда отбасылық дауларды шешуге көмектесіп, қиын жағдайға тап болған жандарға сүйеу көрсетіледі. Білікті мамандар құқықтық, психологиялық және әлеуметтік қолдау ұсынады. 2023 жылдан бері жұмыс істеп келе жатқан «Жанұя» орталықтары жүздеген отбасыға көмек берді. Биылдың өзінде 161 отбасы, яғни 408 адам қолдау тапты. Енді FSM Social ақпараттық жүйесі енгізіліп, әр отбасының жағдайы цифрлық бақылауда болады.
Аумағы 512 шаршы метрді құрайтын жаңа ғимарат заманауи талаптарға сай жабдықталған. Мұнда 28 маман еңбек етеді. Олардың қатарында заңгер, психолог, әлеуметтік қызметкерлермен қатар дәрігер-терапевт, массажист, йога нұсқаушысы, мәдениет мамандары мен ағылшын тілі және компьютерлік сауаттылық пәнінің оқытушылары бар.
Орталықтың директоры Эльмира Қожатаева:
– Әрбір жанның отбасында бейбіт өмір сүріп, қарттардың қадірі артып, көмекке мұқтаж жандардың қолдаусыз қалмауы – біздің басты мұратымыз. «Жанұя» – сол мақсатқа жетудің нақты қадамы, – деді.
Жаңа орталыққа аудан тұрғындарымен бірге жақын маңдағы ауылдардың халқы да жүгіне алады. Ол қиын сәтте жанына демеу іздегендерге тірек, қарттарға белсенді өмір сүруге жағдай жасайтын сенім мен қамқорлық мекені болмақ.
Сәрби ӘЙТЕНОВА
