Конституция – ел дамуының, ұлт болашағының кепілі. Бұл жолда аянбай тер төгіп, еңбек еткендер ескерілмей қалмауы керек. Осы орайда облыс әкімдігінде Президент Қасым-Жомарт ТОҚАЕВТЫҢ Жарлығымен Қазақстан Республикасы мемлекеттігінің қалыптасуына, егемендігінің нығаюы мен әлеуметтік-экономикалық дамуына қосқан елеулі үлесі үшін өңірдегі бірқатар азаматтар марапатталды.
Салтанатты жиында облыс әкімінің бірінші орынбасары Әлібек Жақанбаев сөз сөйлеп, өңірде атқарылып жатқан жұмыстарға кеңінен тоқталды. Республика көлемінде жақсы нәтижеге қол жеткізіп, жетісулықтар бүгінде көшбасында тұрғанын тілге тиек етті.
Әрмен қарай Әлібек Әскербекұлы жиынға қатысушыларды Конституцияның 30 жылдығымен құттықтап, Қазақстан Республикасы Президентінің Жарлығымен мемлекеттің қалыптасуына, егемендігінің нығаюы мен әлеуметтік-экономикалық дамуына қосқан елеулі үлесі үшін Алматы және Жетісу облыстарының Құрметті азаматтары Жомартқали Жексембинов пен Оралбек Жақияновқа, облыстық ардагерлер кеңесінің төрағасы Ермек Келемсейітке, облыстық мәслихат төрайымы Гүлнар Тойлыбаеваға, облыс әкімі аппаратының мемлекеттік-құқықтық бөлімінің басшысы Айнұр Дауылбаеваға, Алакөл ауданы әкімінің орынбасары Арман Қабаевқа, Сарқан ауданы, Көктерек ауылдық округінің әкімі Серік Смағұловқа, Көксу ауданы, Лабасы ауылдық округінің бас маманы Анар Сарымолдаеваға «Қазақстан Республикасының Конституциясына 30 жыл» мерекелік медалін табыстады.
Шара барысында сөз алған облыстық ардагерлер кеңесінің төрағасы Ермек Келемсейіт:
– Азғантай еңбегімізді елеп-ескеріп осындай марапатқа жеткізіп отырған халыққа, облыс әкімдігіне, Мемлекет басшысына көп-көп рахмет! Біз облысымыздың дамып, өркендеп келе жатқанының куәгеріміз. Қаншама нысан салынып жатыр, мұның бәрі халқымыздың тыныштығының, Ата Заңымыздың тұрақтылығының нәтижесі. Еліміз гүлдене берсін! Марапат иегерлерінің бәрін құттықтаймын, – деп түйіндеді.
Жиын соңында марапат иегерлері суретке түсіп, ел амандығын тілесті.
Медет ЖҰМАБАЙ
