Талдықорған қалалық жолаушылар көлігі және автомобиль жолдары бөлімінің мәліметінше, биыл шаһардағы жол қозғалысын жүйелі түрде ретке келтіру мақсатында жаңа бағдаршамдар орнатылуда. Атап айтқанда, облыс орталығындағы Жалайыри даңғылы мен Есенберлин көшесінің, Балапанов пен Жексенбеков көшесінің қиылыстарында заманауи бағдаршамдар іске қосылса, «Жастар-1» тұрғын үй алабындағы Қадыржанов көшесі мен Жалайыри даңғылында жаңа бағыттар ашылған. Сонымен бірге оңға бұрылуға арналған бағдаршамдар да жұмыс жасауда. Мұндай өзгерістер қазірге қаладағы Ақын Сара көшесінен Қабанбай батыр көшесіне, Абай көшесінен Назарбаев даңғылына бұрылатын бағытта жұмыс жасауда.
Сала мамандарының сөзінше, жыл соңына дейін қала көшелеріне дәл осындай тағы 5 бағдаршам орнатылмақ. Олардың екеуі көлік қозғалысын реттеуге, үшеуі жаяу жүргіншілер арналған. Жаңадан енгізіліп жатқан бұл өзгерістер шаһар тұрғындарының қауіпсіздігін қамтамасыз етумен бірге, көлік ағынын реттеуге мол мүмкіндік береді. Сонымен бірге қаладағы Гаухар ана көшесінде екі бағыттағы көлік қозғалысы ашылған. Бұрын біржақты қозғалыста ғана болған бұл көшеде енді көліктер қос бағытта еркін жүре алады. Әрі бұл қанаттас көшелердің жүктемесін барынша азайтады.
Еске сала кетсек, өткен жылы облысының орталығындағы Қонаев және Балапанов, Назарбаев даңғылы мен Рүстембеков сынды бір қатар көшенің қиылысындағы бағдаршамдар дыбыстық құрылғылармен жабдықталған болатын. Мүмкіндігі шектеулі жандарға арналған құрылғы еліміз бойынша тұңғыш рет сынақтан өткізілу мақсатында Талдықорған қаласында орнатылған. Құрылғының басты ерекшелігі – көзі көрмейтін, құлағы нашар еститін жандар үшін және қарттар мен балалардың көшеден өтуіне өте қолайлы әрі қауіпсіз. Аталған дыбыс құрылғысын Назарбаев зияткерлік мектебінің түлектері және «it-service Education» жастар қоғамдық бірлестігінің мүшелері ойлап тапқан. Қазіргі уақытта бұл құрылғы жоғары сұранысқа ие.
Айдын КӘЛІМХАН
