Тіл мерекесіне орай Талдықорған қаласында өрнек тапқан тағылымды шараларда осынау ойды ғалымдар мен тіл мамандары, қаламгерлер баса айтты. Мемлекеттік тілдің мәртебесі әрбір азаматтың елжандылық, отансүйгіштік сезімімен биіктейтінін де тақырыпқа айналдырды.
Қазақстан халқының тілдері күніне орай «Тіл – татулық тірегі» атты салтанатты шара мен «Мемлекеттік тіл және тілдік тұлғаны қалыптастыру моделі: тарих, инновация, әдістеме» атты ғылыми-практикалық конференциясы ұйымдастырылды.
Бір тәулікке созылған ғылыми конференция пленарлық мәжілістен бөлек, 3 секциядан тұрды. Әр бөлімде «Тіл» оқыту орталығының мамандары мен аудан-аудандағы жетекшілері басты құндылығымыз, ұлт танымының күретамыры болған тіл саласына қатысты зерттеулерін, баяндамаларын оқып, өзара тәжірибе алмасты.
Конференцияда алғашқы болып сөз алған қоғамдық даму басқармасы тіл және ономастика бөлімінің басшысы Ермек Ақшабаев:
– Тіл – халықтың жаны, рухани қазынасы, елдіктің ең басты белгісі. Мемлекеттік тілдің мәртебесін арттыру, оны қоғамдық өмірдің барлық саласында кеңінен қолдану – баршамыздың ортақ парызымыз. Осы тұрғыда тілдік тұлға қалыптастыру мәселесі – тек білім беру жүйесінің ғана емес, бүкіл қоғамның басты міндеттерінің бірі, – дей келе көпшілікті мерекемен құттықтап, конференцияға сәттілік тіледі.
Жиында алғашқы болып Жетісу университетінің қауымдастырылған профессоры, филология ғылымдарының кандидаты Айжан Шыныбекова «Мемлекеттік тілдің әлеуеті және көптілді қоғамда тілдік тұлға қалыптастыру» тақырыбында баяндама жасады. Сол секілді, І. Жансүгіров атындағы Жетісу университетінің қазақ тілі мен әдебиеті кафедрасының оқытушы-дәріскері, магистр, PhD докторант Динара Есімбекова «Тілдік тұлға қалыптастырудағы дәстүр мен жаңашылдықтың сабақтастығы», «Тіл» оқу-әдістемелік орталығы Ескелді аудандық филиалының меңгерушісі, магистр, PhD докторант Әйгерім Молдабаева «Қазақ тілін меңгеруде тілдік тұлға моделін жүзеге асыру тәжірибесі» тақырыбында баяндама жасап, ана тілімізге қатысты мәселелерді көтеріп, тілдік тұлға қалыптастыруды ғылыми, рухани және қоғамдық тұрғыда саралады.
Жоғарыда атап өткеніміздей, «Мемлекеттік тіл және тілдік тұлғаны қалыптастыру моделі: тарих, инновация, әдістеме» ғылыми-практикалық конференциясынан кейін «Мемлекеттік тілдің тарихи қалыптасуы және даму кезеңдері», «Тіл және тұлға: тәрбие, мәдениет, құндылықтар», «Тіл үйренудегі инновациялық технологиялар: жасанды интеллект және әдістеме» тақырыбында 3 секция өтті.
Ал, 5 қыркүйекте Тіл сарайы ауласында «Тіл – татулық тірегі» салтанатты шарасы өрнек тапты. Онда жетісулық зиялы қауым өкілдері мен тіл жанашырлары сөз сөйлеп, адамзат баласының ең басты құндылығы туралы ақық ойларын ақтарды. Мерекелік кеште мемлекеттік тіл мәртебесінің биіктеуі жолында еңбек етіп жүрген жандар арнайы марапатталды.
Асыл СҰЛТАНҒАЗЫ
