Жетісулық жұмыс берушілер еңбеккерлеріне 30 млн. теңгеден аса қаражатты кем төлеген.
Бұл іске облыс прокурорлары араласқаннан кейін жалақы мен үстеме жұмыс үшін тиесілі төлемдер толық берілді. Жалпы өтелген қаржы 30 млн. теңгеден асты. Қадағалау органының деректері бойынша, Конституцияның 24-бабында әркімнің қандай да бір кемсітушіліксіз еңбегі үшін сыйақы алу құқығы бекітілген.
Прокурорлар анықтағандай, «Жаркент Фрукт» ЖШС 66 қызметкерге 16 млн. теңгеден аса жалақы төлемей, олардың құқықтарын бұзған. Сонымен қатар, Текелі қалалық ауруханасында 115 медицина қызметкері белгіленген кестеден тыс жұмыс істегенімен үстемеақысын ала алмаған. Қарыз мөлшері – 15 млн. теңгеден асады.
Панфилов ауданы мен Текелі қаласы прокурорларының қадағалау актілері бойынша жұмыс берушілер әкімшілік жауапкершілікке тартылып, қызметкерлердің еңбегі толық көлемде өтелді. Осылайша 181 адамның конституциялық құқықтары қорғалды.
А. Ыбырай
