Ақордада елімізге мемлекеттік сапармен келген Конго Демократиялық Республикасының Президенті Феликс Чисекедиді ресми қарсы алу рәсімі өтті.
Салтанатты шара барысында Қазақстан Президенті Қасым-Жомарт Тоқаев пен Феликс Чисекеди бір-біріне ресми делегация мүшелерін таныстырды. Бұдан кейін Құрмет қарауылының бастығы рапорт беріп, екі елдің мемлекеттік әнұраны шырқалды.
Рәсімнен соң мемлекет басшылары келіссөздерге кірісті. Алдымен тар құрамдағы кездесуде тараптар екіжақты саяси-экономикалық байланыстарды нығайту мәселесін талқылайды. Кейін кеңейтілген құрамда келіссөздер жалғасып, сауда, инвестиция, тау-кен өндірісі және ауыл шаруашылығы салаларындағы ынтымақтастыққа басымдық берілмек.
Сапар аясында Қазақстан мен Конго Демократиялық Республикасы арасында бірқатар құжаттарға қол қойылады деп күтілуде.
Бұл Феликс Чисекедидің Қазақстанға жасаған алғашқы мемлекеттік сапары болып отыр.
«Жетісу-Ақпарат»
