Шара барысында әлеуметтік жағынан аз қамтылған және көпбалалы отбасылардан шыққан оқушыларға қолдау көрсеткені үшін 23 демеушіге гүл шоқтары мен қала әкімінің Алғыс хаты табысталды. Шаһар басшысы қайырымдылық акциясына бір кісідей қолдау білдірген әрбір жомарт жанға ризалығын жеткізіп, атқарған жұмыстарының көпке үлгі екенін атап өтті.
– Бүгінгі марапат сіздердің жасаған қайырымдылық істеріңізге деген қоғамның, қала тұрғындарының алғысы. Әр баланың қуанышы сіздердің қамқорлықтарыңыздың жемісі. Бұл бастама бір күндік емес, болашаққа бағытталған үлкен жұмыс. Осындай жауапкершілікті сезіне отырып, қамқорлық танытқан әрбір жанға алғысымыз шексіз. Алдағы уақытта да осындай ізгі істеріміз жалғасын табады деп сенемін, – деді Ернат Бәзіл.
Талдықорған бойынша «Мектепке жол» акциясы аясында 7 мыңнан аса оқушыға көмек көрсетілді. Оның ішінде 5 647 балаға жалпыға бірдей білім беру қоры есебінен оқу құралдары табысталды. Яғни әр оқушыға 46 мың 228 теңгеден қаржылай көмек берілді. Бұдан бөлек, тағы 2 мың бала қайырымды жандардың тарапынан қолдауға ие болды.
– Біздің тарапымыздан әрдайым оқушыларға ғана емес, барлық көмекке мұқтаж жанға қолдау бар. Қайырымдылық қорлары арқылы аутизм диагнозы қойылған балалармен жұмыс істейміз. Биыл да жыл сайынғы дәстүрді сақтай отырып, іскер әйелдер қауымдастығы республика тарапынан жасалып жатқан игі бастамаға қолдау білдірді. «Мектепке жол» акциясы аясында 100 оқушыға оқу құралдарын сатып алу үшін сертификаттар табыстадық, – дейді облыстық іскер әйелдер қауымдастығының төрағасы Әнел Кәпекова.
Айта кетейік, қайырымдылық шарасына облыстық басқармалар, мәслихат депутаттары, жергілікті кәсіпкерлер, іскер әйелдер қауымдастығы және өзге де мекемелер белсене атсалысты.
Медет ЖҰМАБАЙ
