Президент Қасым-Жомарт Тоқаев Мәскеу және бүкіл Ресей патриархы Кириллмен кездесті, – деп хабарлайды 7-su.kz ақпараттық порталы.
Мемлекет басшысы Әлемдік және дәстүрлі діндер көшбасшыларының VIII съезіне қатысу үшін Астанаға келген патриарх Кириллмен жүздесті.
Президент бұл кездесудің Қазақстан мен Ресей арасындағы ынтымақтастықты дамыту жолындағы маңызды қадам екенін атап өтті.
– Ең алдымен, Съезге арнайы келгеніңіз үшін ризашылығымды білдіремін. Сіздің бұл жиынға қатысуыңыз форумның табысты өтуі тұрғысынан аса маңызды. Біз Сізді құрметтейміз. Қазақстан мен Ресей – стратегиялық серіктес, одақтас елдер, – деді Мемлекет басшысы.
Патриарх Кирилл Қасым-Жомарт Тоқаевқа қонақжайлық үшін алғыс айтып, Орыс православие шіркеуінің миссиясы халықтар арасындағы бейбітшілік пен өзара түсіністікті нығайтуға бағытталғанын жеткізді.
– Қасиетті Қазақстанға келу мені әрдайым қуантады. Бұл – біздің достас ел. Ғасырлар бойы қатар өмір сүріп келеміз. Қазір мемлекеттеріміз бөлек болғанымен, достық пен өзара қолдау байланысы берік сақталып отыр, – деді Мәскеу Патриархатының басшысы.
Қасым-Жомарт Тоқаев екі ел арасындағы рухани ынтымақтастықты нығайтуға қосқан үлесі үшін патриарх Кириллді «Алтын Қыран» орденімен марапаттады.
