Басқосуда медициналық тексерістен өткен жастардың денсаулығы мен моральдық-психологиялық дайындығына баса назар аударылды.
Қалалық қорғаныс істері жөніндегі басқарманың басшысы, полковник Мақсат Дуйсебековтің сөзінше, қазір күзгі әскерге шақыру науқаны басталды. Шара бірінші қыркүйектен 31-ші желтоқсанға дейін жалғасады. Биыл күзде Жетісу облысының орталығынан 200-ге жуық азамат әскерге аттандырылмақ. Олар Отан алдындағы борышын Ұлттық қауіпсіздік комитетінің шекара қызметінде өтейтін болады. Бұл жолы медициналық тексерістен өткен бірқатар жастардың денсаулығы бағаланып, Қорғаныс министрлігінің Қарулы күштерінде, Мемлекеттік күзет қызметінде және Ұлттық ұлан қатарына жіберілмек. Ал әскерге жарамсыз дегендердің денсаулығы жан-жақты тексеріліп, Заң тармақтарына сәйкес тиісті шешімдер қабылданбақ.
Сала мамандарының мәліметінше, әр жылы Жетісу облысынан жалпы 2 мыңға жуық жас әскерге аттандырылады деп жоспарланған. Осыған сай бүгінде әскер қатарына шақырылып жатқан жастардың көңіл күйі жақсы, әскери борышты өтеуге деген ынтасы зор. Себебі, бүгінде Қазақстан Республикасы Президентінің ұйғарымымен сарбаздарға жоғары оқу орындарына түсуге бар мүмкіндік қарастырылған. Бастысы әскери борыш ең алдымен ішкі тәртіпті қалыптастырып, жастарға азаматтық жауапкершілік жүктейді.
Айдын КӘЛІМХАН
