Бүгінде елде халықты таза ауыз сумен қамту мәселесіне айрықша көңіл бөлініп келеді.
Сарапшылардың айтуынша, су сапасының төмендеуі шөлмектегі ауыз суды тұтынуды арттыруда. Осыған байланысты Талдықорған қаласындағы «Sauda LUX» жеке кәсіпкерлігі «Freshsu» шөлмектегі ауыз суды өндіру, жеткізу және сатумен айналысады. Жетекшісі Алмас Демесиновтың айтуынша, поликарбонат шөлмектеріне құйылған ауыз судың сыйымдылығы 18,9 литрді құрайды. Ал минералдану деңгейі 100-500 мг./ л. Ол ішуге, ас әзірлеуге және сусын дайындауға қолданылады.
«Freshsu» суы механикалық тазарту, жұмсарту, сүзу, молекулалық тазарту және ультракүлгін сәулемен дезинфекциялауды қамтитын бес сатылы кешенді өңдеуден өтеді. Сондай-ақ, су озонмен байытылып, ерекше балғын дәмін сақтайды. Құю цехы күніне 500-ден аса шөлмек шығаратын автоматтандырылған желімен жабдықталған. Бөтелкелерді жуу, су құю сияқты барлық үдеріс адамның қатысуынсыз жүзеге асырылады.
Таза су кеңселер мен бизнес және сауда орталықтары, мектептер, балабақшалар, спорт ұйымдары, мейрамханалар, банктер және жеке үйлерде тұтынылады. «Forte bank» АҚ-ға жүгінген компания инвестицияларға несие алды. «Бірыңғай кешенді бағдарлама» шеңберінде несие бойынша пайыздық мөлшерлеме субсидиялау құралымен жылдық 8% — ға дейін төмендетілді. Жетіспейтін кепілмен қамтамасыз ету бөлігінде «Даму» қорының кепілдігі берілді.
Айгүл Байжұмақызы
Талдықорған қаласы
