Оқу-ағарту министрлігі дарынды оқушылар мен мұғалімдерді қолдау үшін SMART Daryn ұлттық цифрлық платформасын іске қосты, – деп хабарлайды 7-su.kz ақпараттық порталы.
Бұл туралы Орталық коммуникациялар қызметінде өткен брифингте Орта білім беру комитетінің төрағасы Қаныбек Жұмашев мәлімдеді.
Жаңа жүйе олимпиадалар мен конкурстарды тіркеуден бастап қорытынды нәтижелерге дейін автоматтандырады. Оның басты ерекшелігі – прокторинг жүйесі арқылы әділ әрі ашық онлайн сайыстар өткізу мүмкіндігі.
SMART Daryn қатысушыларға тәжірибелі жаттықтырушылардан кеңес алу, онлайн оқыту арқылы білімін жетілдіру және зияткерлік жарыстарға дайындалу сияқты жаңа мүмкіндік береді. Жоба оқушылардың шығармашылық әлеуетін дамытуға, мұғалімдердің кәсіби біліктілігін арттыруға бағытталған.
Министрліктің дерегінше, 2024–2025 оқу жылында қазақстандық оқушылар 35 халықаралық олимпиада мен ғылыми байқауда 1006 медаль иеленді. Сонымен қатар 2025 жылы жеңімпаздар мен олардың тәлімгерлеріне жалпы көлемі 100 миллион теңгеден астам сыйақы берілді.
