Тіл айлығы аясында мектептерде, жоғары оқу орындарында, мекемелерде түрлі байқау, ғылыми-танымдық конференция, әдеби кеш ұйымдастырылып келеді.
Осы ретте қазақ тілі мен әдебиеті пәндері бірлестігінің мұрындық болуымен Талдықорғандағы №28 IT-лицейінде «Тарихтан – тілге, дәуірден – әдебиетке» атты IQ Battle интеллектуалды сайысы өтті. Білім ошағының 10-11-сынып оқушылары қатысқан шарада әр топ ерекше белсенділік танытып, шығармашылық қабілеттерін көрсетті. Олар қазақ тіл және әдебиет пәні бойынша білімдерін сынады.
Жарыс қорытындысы бойынша I орынды 11 «Ә» сынып оқушылары еншілесе, II орын 10 «А», III орын 10 «Ә» сыныбының өрендеріне бұйырды. Белсенділік танытқан жастар жүлделі орындармен марапатталса, барлық қатысушыға №28 IT-лицейі директорының Алғыс хаты табыс етілді.
«Мектепішілік IQ Battle» интеллектуалды сайысы – мектеп оқушыларының зияткерлік қабілеттерін, логикалық ойлауын және пәндік білімін дамытуға бағытталған. Білім бәсекесі аталған оқу орнында 3 жылдан бері дәстүрлі түрде өтіп келеді. Қазақ тілі – тек қарым-қатынас құралы емес, ол – тарихымыздың алтын қазығы, ұлттық болмысымыздың айнасы. Мемлекеттік тілдің тағдыры – әрбір азаматтың қолында екенін естен шығармайық.
Ясин Оралбек
