Жетісу облысында қайғылы апаттан белгілі Қызылағаш су қоймасының қайта жаңғырту жұмыстары аяқталды, – деп хабарлайды 7-su.kz ақпараттық порталы ҚазТАГ сайтына сілтеме жасап.
«Биыл су ресурстары және ирригация министрлігі Жетісу облысындағы Қызылағаш су қоймасының реконструкциясын аяқтады. Нақтырақ айтқанда, су тасқыны үшін пайдаланылатын су жіберуге арналған канал нығайтылып, су қабылдайтын жаңа торап салынды. Сонымен қатар заманауи бақылау датчиктері орнатылып, автоматтандырылған мониторинг жүйесі мен жергілікті хабарландыру жүйесі енгізілді», – деп хабарлады сәрсенбі күні су ресурстары және ирригация министрлігінің баспасөз қызметі.
Ведомство мәліметінше, сыйымдылығы 42,6 млн. текше метр болатын су қоймасының реконструкциясы 6 680 гектар егістік алқабын сумен тұрақты қамтамасыз етуге мүмкіндік берді.
«Мемлекет басшысы еліміздің су шаруашылығы инфрақұрылымын жаңғырту міндетін қойған болатын. 2023 жылы жүргізілген гидротехникалық нысандарды түгендеу нәтижесінде су саласын дамытудың кешенді жоспары әзірленді. Ол 160-тан астам іс-шараны қамтиды. Соның ішінде 42 жаңа су қоймасын салу және 37 жұмыс істеп тұрған нысанды реконструкциялау жұмыстары бар. Қызылағаш су қоймасын реконструкциялау жергілікті тұрғындарды су тасқынынан қорғап, Жетісу облысының ауыл шаруашылығын дамытуға серпін береді», – деді су ресурстары және ирригация вице-министрі Ерболат Ибрайханов.
Еске салсақ, 2010 жылғы 12 наурызға қараған түні Қызылағаш ауылында су қоймасы бөгетінің жарылуы салдарынан су тасқыны болып, шамамен 180 үйді су басты және 45 адамның өмірін қиды, олардың ішінде 15 бала болды. 300-ден астам адам жарақат алды, шамамен 2 мың адам эвакуацияланды. Ал ауыл айтарлықтай қирады – 146 үй толықтай сүрілді, 251 үй қирап, 42-сі зақымданды. Билік алдағы апат туралы алты сағат бұрын жедел хабарлаған. Бұл мыңнан астам адамның өмірін сақтап қалуға мүмкіндік берді. Алайда апаттың ауқымы орасан болды, Қызылағашты қалпына келтіру бірнеше айға созылды, оған жаңа үйлер мен инфрақұрылым салу да кірді. Сот бөгетті басқаруға байланысты бұрынғы басшыларды кінәлі деп танып, оларды қайғылы оқиға үшін түрме жазасына кесті, ал ауылда су тасқыны құрбандарын еске алу мемориалы орнатылды.
