Жетісу облысы Алакөл ауданында республикалық маңызы бар автожолда жол-көлік оқиғаларының алдын алу мақсатында арнайы рейд ұйымдастырылды. Іс-шараға аудандық полиция бөлімінің қызметкерлері мен облыстық патрульдік полиция батальоны қатысты, – деп хабарлайды 7-su.kz ақпараттық порталы.
Рейдтің басты мақсаты – ұзақ жолда шаршап, ұйқылы күйде көлік жүргізетін адамдарды анықтап, олардың әрі қарай қозғалуына жол бермеу. Мұндай шаралар жүргізушілердің демалысқа уақыт бөлуіне, жол үстіндегі қауіпсіздікті сақтауға және қайғылы жағдайлардың алдын алуға бағытталған.
Тексеру барысында полицейлер жүргізушілерге міндетті түрде тынығудың маңыздылығын түсіндіріп, ыстық шай ұсынып, қауіпсіздік ережелерін еске салды.
– Шаршаған жүргізушіні дер кезінде тоқтату – адам өмірін сақтап қалудың ең тиімді жолдарының бірі. Жүргізушінің бір сәттік ұйқышылдығы ауыр зардаптарға әкелуі мүмкін, – деп атап өтті тәртіп сақшылары.
Рейд кезінде Өскемен–Талдықорған бағыты бойынша 13 көлік тоқтатылып, жүргізушілерге уақытша жолға шығуға тыйым салынды. Полицейлердің түсіндіру жұмыстарынан кейін жүргізушілер бастаманы қолдап, аталған іс-шараға ризашылықтарын білдірді.
Жетісу облысының Полиция департаменті:
- ұзақ сапарға шықпас бұрын толық тынығуды,
- жол ережесін қатаң сақтауды,
- өз өмірі мен жолаушылардың қауіпсіздігін басты назарда ұстауды ескертеді.
Бұл шара «Заң және тәртіп» идеологиясы аясында жүзеге асырылып, азаматтардың өмірін сақтауға және жолдағы қауіпсіздікті күшейтуге бағытталған маңызды қадамдардың бірі болып отыр.
