Алакөл ауданы бойынша шекара басқармасының құрылғанына 60 жыл толуына орай «Үшарал жауынгерлік жасағына алпыс жыл» атты тарихи кітап жарық көрді. Жаңа еңбектің тұсаукесері Ілияс Жансүгіров атындағы мәдениет үйінде өтті.
Шараға ҚР ҰҚК Шекара қызметі Жетісу облысы бойынша департаментінің бастығы, полковник Марат Нарбаев қатысып, кітаптың тарихи маңыздылығына тоқталды. Оның айтуынша, еңбектің қазақ, орыс және ағылшын тілдерінде алғаш рет басылып шығуы – ерекше жаңалық.
Кітаптың авторлары – подполковник М.Қарекенов пен ефрейтор К.Елеубаева. Олар шекарашылардың қызмет жолын, ардагерлердің естеліктерін және ел тарихындағы маңызды кезеңдерді жүйелі түрде жинақтап, бүгінгі ұрпаққа ұсынған.
Жинақ төрт бөлімнен тұрады. Алғашқы бөлімде құттықтаулар берілсе, келесі тарауларда шекара басқармасының қалыптасуы, Жалаңашкөл оқиғасы, Ауған соғысы кезіндегі ерліктер жан-жақты баяндалады. Сондай-ақ, тәуелсіздік кезеңіндегі шекара күзеті, генерал-майорлар А.Үмбетбаев пен Х.Беркалиевтің еңбектері мен ардагерлердің өмір жолы кеңінен қамтылған. Соңғы бөлімде патриоттық өлеңдер топтастырылған.
Авторлардың сөзінше, «Үшарал жауынгерлік жасағына алпыс жыл» кітабы тек шекарашылар үшін емес, жалпы қазақстандықтар үшін құнды еңбек. Ол ерлік дәстүрін дәріптеп, жас ұрпаққа үлгі болуды мақсат етеді.
Жаңа басылым әскери тарихқа қызығатын оқырмандар мен кәсіби мамандар үшін де маңызды дереккөз болмақ.
«Жетісу-Ақпарат»
