Күз шаруа айы десек, бұл мезгілдегі жұмыстар қазір қызып жатыр.
Табиғат берген мол ырыздықты төкпей-шашпай уақытылы жинап алуға күздің жайма-шуақ мезгілі қолайлылық танытып тұр. Яғни, шаруа адамы қысқы азықты қамдап алуда әлі де тер төгу үстінде. Бүгінде облыста жүгері жинау науқаны басталды. Биыл аймақта 42 мың гектардан аса жерге осы дақыл түрі себілді. Қазір Панфилов, Кербұлақ және Қаратал аудандарында егін орағының қарқыны қыза түсті.
Жаздың құрғақшылығына қарамастан шаруалар орта есеппен әр гектардан 73 центнерден өнім жинайды. Бүгінге дейін 28 мың тоннадан аса дақыл қамбаға құйылды. Жалпы өңірде 240 гектар алқапта дәнді дақылдар жиналып, 440 мың тоннаға жуық бидай, сұлы, күріш және арпа бастырылды.
Облыстық ауыл шаруашылығы басқармасының бас маманы Аманжол Қасымовтың айтуынша, биыл жүгері өнімінің көлемі 308 мың тоннаны құрайды. Бұл өткен жылмен салыстырғанда 10 мың тоннаға артық. Астық жинау жұмыстарына барлығы 10 мыңнан астам трактор мен 1000 комбайн жұмылдырылған.
«Jetіsý-ақпарат»
