Қазақстанда Үкімет пен «Carlsberg Central Asia» ЖШС арасындағы келісім аясында алкогольсіз сусындар шығаратын зауыттың құрылысы басталады, – деп хабарлайды 7-su.kz ақпараттық порталы Aikyn.kz сайтына сілтеме жасап. Тиісті қаулыға Премьер-министр Олжас Бектенов қол қойды.
Жаңа өндіріс Алматы облысының Іле ауданында салынып, халықаралық стандарттарға сай заманауи технологиялармен жабдықталады. Инвестиция көлемі 216 млрд теңгеден асады. Кәсіпорын жылына 340 млн литр өнім өндіруге қауқарлы болады.
Жобаның іске асырылуы агроөнеркәсіп пен тамақ өнеркәсібінің дамуына серпін беріп, экспорттық әлеуетті арттыруға ықпал етпек. Өндірісте негізінен отандық шикізат пен материалдар қолданылып, импортты алмастыруға жол ашылады.
Кәсіпорында 230-дан астам жұмыс орны құрылады. Оның кемінде 85%-ын Қазақстан азаматтары иеленеді. Жергілікті кадрларды даярлау үшін арнайы оқыту және тағылымдамадан өту бағдарламалары ұйымдастырылады.
Зауыт жобасында энергия үнемдеу, суды тиімді пайдалану және экологиялық талаптарды сақтау басты назарда болады.
Инвесторларға салықтық жеңілдіктер ұсынылып, келісім шеңберінде шарттардың тұрақтылығына кепілдік берілген. Жоба Үкімет жанындағы Инвестициялық штабтың бақылауында, ол әкімшілік рәсімдерді жеңілдетіп, мемлекеттік органдармен өзара іс-қимылды қамтамасыз етеді.
Ірі трансұлттық корпорацияларды тарту – Үкіметтің басым бағыттарының бірі екені атап өтілді.
