Талдықорған қаласындағы Ілияс Жансүгіров атындағы Мәдениет үйінде облыстық полиция департаментінің киберполиция қызметкерлері мен экономикалық тергеулер департаменті бірлесіп профилактикалық іс-шара өткізді, – деп хабарлайды 7-su.kz ақпараттық порталы.
Кездесудің негізгі тақырыбы киберқылмыстың алдын алу және цифрлық кеңістіктегі қауіпсіздікті қамтамасыз ету. Мамандардың айтуынша, киберқылмыс бүгінгі заманның өзекті мәселелерінің бірі. Оның аясында ақпарат ұрлығы, онлайн алаяқтық, бопсалау, тыңшылық және ақпараттық жүйелерге заңсыз қол жеткізу әрекеттері қамтылады. Күдіктілер деректер қорын бұзу, жалған қоңырау шалу, фишингтік хат жіберу сияқты түрлі тәсілдер қолданатыны атап өтілді.
Кездесу барысында интернеттегі қауіпсіздік ең алдымен қолданушының қырағылығына байланысты екені ерекше айтылды. Жеке деректерге мұқият қарау, белгісіз сілтемелерге өтпеу және күмәнді дереккөздерден аулақ болу кибершабуылдардан қорғанудың басты жолдары екені түсіндірілді.
Іс-шараға 550-ден астам адам қатысты. Олардың қатарында 300 оқушы, 150 студент және 100 денсаулық сақтау саласының маманы болды. Қатысушылар үшін бұл кездесу интернеттегі қатерлер жайлы ақпарат алумен қатар, цифрлық ортада жауапты мінез-құлық қалыптастыруға бағытталған маңызды қадам болды.
