Қасым-Жомарт Тоқаев жаңадан тағайындалған Премьер-министрдің орынбасары – Жасанды интеллект және цифрлық даму министрі Жаслан Мәдиевті қабылдады, – деп хабарлайды 7-su.kz ақпараттық порталы Ақорданың баспасөз қызметіне сілтеме жасап.
Кездесу барысында Мемлекет басшысы ұлттық цифрлық инфрақұрылымды дамыту, экономика мен әлеуметтік салаға жасанды интеллектіні енгізу және азаматтар мен бизнес үшін мемлекеттік қызметтердің сапасын арттыру жөнінде тапсырма берді.
Президент ЖИ және цифрлық технологиялар саласында білікті мамандар даярлау ісіне ерекше назар аударды. Сондай-ақ жоғары технологиялар бағытында халықаралық ынтымақтастықты кеңейтіп, Қазақстанның өңірлік цифрлық хаб ретіндегі орнын нығайту қажеттігін айтты.
Жаслан Мәдиевке Қазақстанды цифрлық мемлекетке айналдыру жөніндегі Жолдауда белгіленген басым міндеттерді жүзеге асыру тапсырылды.
