Облыста табиғи монополия субъектілері қызметінің ашықтығы мен айқындығын қамтамасыз ету мақсатында Ұлттық экономика министрлігінің Табиғи монополияларды реттеу комитетінің облыстық департаменті «Жетісу Водоканал» кәсіпорнының нысандарына баспасөз турын ұйымдастырды.
Бұл шараның басты мақсаты – кәсіпорын жұмысы жайлы жұртшылыққа толыққанды ақпарат беру, сонымен қатар қоғам мен билік арасындағы сенімді нығайту.
Турға облыстық мәслихат депутаттары, коммуналдық кәсіпорын өкілдері, мемлекеттік органдар, өңірлік кәсіпкерлер палатасы мен қоғамдық ұйымдардың мүшелері қатысты.
Кәсіпорынның өндірістік-техникалық бөлімінің бастығы Андрей Рогожиннің айтуынша, 2025 жылға арналған инвестициялық бағдарлама көлемі 164,3 млн. теңгені құрап отыр. Қаржы кәсіпорынның өз қаражаты есебінен бөлініп, су құбыры мен кәріз жүйелерін жаңарту мен күрделі жөндеуге бағытталуда. Бұл өз кезегінде желілердің тозуын азайтып, жүйенің тұрақты жұмыс істеуіне мүмкіндік береді.
Алғашқы нысан – Талдықорған қаласындағы Желтоксан көшесі. Мұнда кәріз желілері ауыстырылуда.
– Қаладағы барлық ағынды сулардың 30 пайызы төменгі бөлікке – тубдиспансер жағына қарай ағады. Мұнда сорғы стансысы орналасқан. Сол арқылы ағынды су Кабанбай батыр көшесіне жеткізіліп, ары қарай тазарту құрылыстарына барады. Инвестжоба аясында біз Жапсарбаев көшесінен Ақылбеков көшесіне дейінгі аралықтағы 200 метр құбырды ауыстырудамыз. Болат құбырлардың орнына пластик құбыр салынып жатыр. Себебі бұл жер орта агрескур, – деді бөлім басшысы Андрей Рошков.
Келесі нысан – Өтенай ауылындағы Жансүгіров көшесі. Мұнда Жамбыл мен Абай көшесі дейінгі аралығындағы 300 метр ауызсу құбыры жаңартылуда. Бұл жерде су қысымына төзімді болат құбыр қолданылады. Сондай-ақ, апатты жағдайдағы Жаңа ғасыр және Ойжайлау көшелеріндегі диаметрі 100 құбырлар да ауыстырылатын болады.
Жалпы, инвестициялық бағдарлама аясындағы барлық жұмыстар жоспарға сәйкес жүргізіліп, жыл соңына дейін толық аяқталмақ. Сонымен бірге, кәсіпорын 2026–2030 жылдарға арналған даму жоспарымен бөлісті. Алдағы кезеңде су жүйесінің сенімділігі мен тиімділігін арттыру бағытындағы жобалар жүзеге асырылып, тарифтік саясатқа енгізілмек.
Бір сөзбен айтқанда, «Жетісу Водоканалдың» қызметі ашықтық пен айқындыққа негізделген. Бұл қоғам мен билік арасындағы өзара түсіністік пен сенімді нығайтып, халыққа сапалы қызмет көрсетудің кепілі болып отыр.
Санжар СҰЛТАНҒАЗЫ
