Ақсу ауданының орталығы – Жансүгіров ауылында «Таза Қазақстан» экологиялық бағдарламасы аясында күзгі санитарлық тазалық айлығы бастау алды. Бұл шараның негізгі мақсаты – ауылды абаттандыру, қоршаған ортаны қорғау және тұрғындардың экологиялық мәдениетін арттыру.
Айлықтың алғашқы күндерінде ауыл әкімдігі, мемлекеттік мекемелер қызметкерлері мен ауыл тұрғындары бірлесіп сенбілік өткізді. Әсіресе, ауыл тұрғындары жиі баратын демалыс орны – орталық саябақ түгелдей тазартылып, қоқыстар шығарылды. Жапырақтар жиналып, ағаштар мен бұталар ретке келтірілді. Бұл жұмыстар ауылдың көркін арттырып қана қоймай, табиғатты аялауға деген сүйіспеншілікті де күшейтті.
Сенбілікке ауыл жастары мен еріктілер белсене қатысып, туған жерге жанашырлық танытты. «Ауылына қарап, азаматын таны» дегендей, тазалық пен тәртіпке бағытталған бұл бастама жас ұрпақтың бойына туған жерге деген жауапкершілік сезімін сіңіруге ықпал етуде.
Айлық аясында тек саябақ қана емес, ауыл көшелері, мекеме аулалары, білім беру ұйымдарының маңы, арналар мен жол жиектері де тазартылмақ. Сонымен қатар, көше бойларына ағаш отырғызу, қураған бұталарды кесу, ескі құрылыс қалдықтарын шығару жұмыстары жоспарланған. Бұл жұмыстар барлық ауылдық округтерде қолға алынуда.
«Таза Қазақстан» бағдарламасы – қоршаған ортаны қорғауға бағытталған ұлттық деңгейдегі маңызды бастама. Ақсу ауданындағы тазалық айлығы осы бағдарлама аясында жүзеге асып, ауылдардың көркеюіне, тұрғындардың экологиялық мәдениетінің артуына өз үлесін қосуда.
Ауыл әкімдігі тұрғындарды аталған шараларға белсене қатысуға шақырып, әрбір азаматты туған жеріне жанашырлықпен қарауға үндейді.
Ербол СЫМХАНОВ
Ақсу ауданы
