Қазақ қоғамында қарияға құрмет көрсету – қашаннан қастерлі дәстүр. «Қарты бар елдің – қазынасы бар» деген тәмсіл де бекер айтылмаса керек. Осы дәстүрді дәріптеп, ардагерлер мен аға буынға қамқорлық көрсетуді мақсат еткен Қарттар күні жыл сайын ел көлемінде аталып өтеді.
Биылғы мереке аясында Ескелді аудандық орталық ауруханасында Ашық есік күні ұйымдастырылды. Шара барысында 215 аудан тұрғыны тегін медициналық тексеруден өтті. Қариялар мен тұрғындарды қабылдауға психолог, терапевт, кардиолог, хирург және невропатолог мамандар жұмылдырылды.
Бұл күннің маңыздылығын аурухананың психолог маманы Ерлан Тұрсын атап өткен:
– Біз осындай игі шараларға әрдайым қатысамыз. Қарттарымыз арнайы келіп қаралады. Ал әлеуметтік желілерде, әсіресе Instagram парақшасында ризашылықтарын білдіріп жатады. Бұл бізге де күш-қуат береді, – дейді.
Мамандардың айтуынша, мұндай шаралар алдағы уақытта да жалғасын табады. Өйткені қазыналы қарттарға көрсетілген әрбір қамқорлық – болашақ ұрпаққа үлгі, қоғамдағы ізгіліктің белгісі.
Жүрек жылытқан бұл шараға келгендердің бірі Шымыр ауылының тұрғыны Күлнәсия Нүсіпова.
– Өзім І топтағы мүгедекпін. Бүгін дәрігерлер тегін қарап, УЗИ-ге түсірді. Бұл – біз үшін үлкен көмек. Қызым да осы ауруханада ішегіне ота жасатқан болатын. Өкінішке қарай, мүгедектігіне байланысты әлеуметтік жәрдемақы ала алмай отыр. Дегенмен, дәрігерлердің еңбегіне ризамын. Қарттарды қадірлеп, осындай қамқорлық көрсетіп жатқан жандарға алғысым шексіз, – дейді зейнеткер.
Қарттар күні тек күнтізбелік мерекеден гөрі, аға буынның қадірін білуге, олардың еңбегін бағалауға шақыратын үлкен тағылым. Ескелді аудандық орталық аурухана ұжымы ұйымдастырған Ашық есік күні осының жарқын көрінісіне айналды.
Санжар СҰЛТАНҒАЗЫ
Ескелді ауданы
