Қазақстанда мүгедек адамдарды (инватакси) тасымалдау бойынша қызметтер көрсету жағдайлары кеңейтілді. Енді мұндай сервисті жеткізушілер әлеуметтік қызметтер порталы арқылы қызмет көрсете алады. Бұл аталған нарықта қатысушылардың шеңберін кеңейтеді.
Осы сектордағы бәсекелестікті кеңейту қажеттілігі туралы мәселені Жетісу облысы бойынша кедергілер жөніндегі кеңес мүшелері көтерді. Мемлекеттік сатып алу туралы заңнамасына сәйкес, инватакси қызметтерін сатып алуды жүзеге асыру үшін, конкурс өткізу көзделмеген, яғни мемлекеттік сатып алу жеткізушімен тікелей шарт жасасу арқылы жүзеге асыру көзделген болатын. Бұл өз ретінде бәсекелестікті шектейді.
Сонымен қатар, мүгедектігі бар адамдарды тасымалдау қызметі (инватакси) мемлекеттік әлеуметтік тапсырысқа жатады, бұл ұйымдар арасында осындай қызметтерді конкурстық негізде көрсетуді көздейді.
Аталған мәселе заңнамалық деңгейде жойылды. «Қазақстан Республикасының кейбір заңнамалық актілеріне тұрғын үй құрылысына, автомобиль жолдарына үлестік қатысу және мүгедек адамдарды тасымалдау бойынша қызметтер көрсету мәселелері бойынша өзгерістер мен толықтырулар енгізу туралы» ҚР Заңы шеңберінде, Әлеуметтік кодекс және «Автомобиль көлігі туралы» ҚР Заңының әлеуметтік қызметтер порталы арқылы инватакси қызметін көрсету бойынша бөлігіне өзгерістер енгізілді.
Заңнамаға енгізілген өзгерістерге сәйкес, инватакси қызметтерін көрсету елді мекенде өнім берушілер болмаған жағдайларды қоспағанда, әлеуметтік қызметтер порталы арқылы жүзеге асырылады. Мұндай жағдайда сатып алу Мемлекеттік сатып алу туралы заңнамаға сәйкес жүргізіледі.
Бұл тәсіл мүгедектігі бар адамдарға қызмет көрсетушіні өз бетінше таңдауға, көлікке тапсырыс беру кезінде жеке қажеттіліктерді ескеруге, нарыққа қатысушылар мен қызмет көрсетушілер шеңберін кеңейтуге, есепке алу мен қызмет көрсетудің ашықтығын қамтамасыз етуге мүмкіндік береді.
