Бүгіннен бастап Қазақстан-Қытай шекарасындағы автомобиль өткізу пункттерінің жұмысы уақытша тоқтатылды, – деп хабарлайды 7-su.kz ақпараттық порталы Мемлекеттік кірістер комитетіне сілтеме жасап.
Бұл шара Қытай Халық Республикасының Құрылған күніне (2025 жылғы 1–3 қазан) және Күздің ортасы мерекесіне (2025 жылғы 6 қазан) орай енгізілді.
«Аталған күндері жеке тұлғалар, автокөлік құралдары мен жүктердің өткізілуі жүзеге асырылмайды», – делінген ресми хабарламада.
Комитеттің мәліметінше, теміржол өткізу пункттері штаттық режимде жұмыс істей береді. Бұл көлік-логистикалық байланыстың үздіксіздігін қамтамасыз етеді.
«Комитет тасымалдаушыларды, сыртқы экономикалық қызметке қатысушыларды және азаматтарды өз бағыттарын жоспарлау кезінде енгізілген шектеулерді ескеруге, тасымалдау кестелерін алдын ала түзетуге шақырады», – деп мәлімдеді ведомство.
