2023 жылы «Ауыл аманаты» бағдарламасынан 4 миллионға жуық несие алған. Сол қаржыға қора-жайын салып, қой, ешкі алған.
– «Мал баққанға бітеді» деп қазақ бекер айтпаған. Мал өсіру оңай шаруа емес. Бейнеті көп. Бірақ бейнетсіз зейнет болмайтыны және белгілі. Ыстық-суығына төзсең ғана табысың еселене түседі. Қазір біз ауылдағы 7 үй арнайы кезек шығарып қой-ешкімізді бағамыз. Таңның атысымен кетіп, кешке қайтып келеміз. Ауылда ірілі-ұсақты шаруа қожалықтары да көбейді. Малды ауылдан екі-үш шақырым жерге апарып жаямыз. Шөлі қанып таза су ішпесе, құнарлы шөп жемесе, малдың күйі қашады. Сол үшін малға ерекше күтім керек. Егер істеп отырған ісіңнің берекелі һәм нәтижелі болғанын қаласаң әр істі өз уақытында істеген дұрыс, – дейді кейіпкеріміз.
Тәуелсіздік алғанға дейін кеңшардың жылқысын баққан кейіпкеріміздің тәжірибесі мол. Жиырма жылдай ат үстінде жүріп, шаруаның қыры мен сырына терең бойлаған оның малы қоңды. Істің ебін білетін азамат ерте кезден мая-мая шөп жинап, қамбасын да астыққа толтырып үлгерген. Төрт түлігінің қыстан қысылмай шығуы үшін ала жаздай қыстың қамын жасаған. Шаруаның айтуынша, баққан адамға қойдың пайдасы ұшан-теңіз. Сатсаң – пұл, сойсаң – тамақ, кисең киім болады. Қазір қорасында 50 шақты қойы бар. Алдын сатып та үлгерген.
Несібесін мал шаруашылығынан тауып отырған шаруа иесі алдағы уақытта қойдың санын арттырып, болашақта асылдандыруды ойластырып жүр. Оның айтуынша, ауылда еңбек етемін деген адамға жұмыс табылады. Ол үшін жалқаулықтан арылып, табыстың көзі – мал шаруашылығына бет бұру керек.
Байғали мен Эльмира ұлықты ұл, қылықты қыз тәрбиелеп, бүгінде олардың қызық-қуанышын көруде. Отанасы бала-шағаның қамы үшін отағасының тапқанын ұқсатып, қара шаңырағының берекесін асыруда. Әзірге шаруа қойды қолдан сұрыптап, қажеттілікке сатады. Осылайша төрт түлікті түлетіп, балаларының жарқын болашағы, елдің ертеңі үшін күні-түні тынымсыз еңбек етіп жүр.
Еңлік КЕНЕБАЙ
